鍾鎮濤（阿B）啱啱推出咗新碟《濤出新天》，嚟緊又會有新動向，佢將會喺3月正式加盟BMA娛樂公司，預計年尾會喺紅館開個人演唱會，暫訂最少3場，揸弗人林珊珊話，草蜢嘅演唱會做得咁成功，佢有信心阿B一定唔會比草蜢遜色，公司仲會為阿B度身訂做開戲，畀佢做男主角，睇嚟阿B破產令完畢，事業可以反彈。
克勤蔡一智牽線
馮仁昭八到今次阿B加盟BMA，拉線人並唔係林珊珊，而係啱啱做咗老襯嘅蔡一智同李克勤。話說蔡一智舊年10月擺酒嗰晚，有人見到阿B同BMA老闆羅傑承坐埋一齊好好傾，原來佢哋已經識咗成30年，羅傑承喺好耐之前已經成日捧溫拿場，兩人見到面梗係要敍吓舊，而去到11月尾嗰陣，佢哋又喺李克勤嘅婚宴入面碰頭，羅生見同阿B咁鬼有緣，於是大家就傾吓有冇機會合作，點知兩個一拍即合。
