經過月初，4大聯賽又回復正常！日子真係好難過，賽事爆到七彩，今明兩日啲波，都唔知點估好……
休息兩、三日之後，今晚又博過。上周六啲波，感受良多！先講曼聯，呢期氣勢好勁，尤其基斯坦奴朗拿度，又再成為贏波功臣，我諗就算作客紐卡素，贏波都應該無問題。
至於曼聯競爭對手車路士，又再失分，原因好簡單，就係無咗泰利。愛隊近呢3場失6球，想當年，車仔後防滴水不漏，殊不知𠵱家變成豆腐後防！相信車仔對住維拉會失波，至於勝負，我對愛隊依然有信心。
小心查爾頓再發惡
利物浦真係好「海鮮」，對住布力般，完全放棄，但係對住強隊熱刺就贏！完全唔知賓尼廸斯諗乜？今晚對住保頓，好難估！反觀富咸，上場迫和車仔，踢出士氣，今晚對屈福特贏硬！
最後，阿仙奴返主場唔會再輸波啩……上仗對錫菲聯，主隊全憑主場爛地幫忙，竟然擊敗「兵工廠」，相信九成九嘅球迷死晒！對住查爾頓，我預測阿仙奴將會苦戰，因為客隊為護級，球迷要小心！
希望新一年，球迷有新突破，衰氣全消！波運齊來！
周鵬
商業1台《球迷集中贏》主持
電郵：[email protected]