紐卡素近期表現非常飄忽，贏吓輸吓，主要贏波來自主場，唔經唔覺主場連贏4場，但贏嘅只係樸茨茅夫等作客一般球隊，略嫌唔夠說服力。
對賽近11場未輸過
相反，曼聯近況狀態大勇，聖誕快車期間3戰全勝，數近期隊中最弗球員，就不得不提基斯坦奴朗拿度。呢位仁兄連續3場梅開二度，至今總共入咗12球，相比起其他前鋒有過之而無不及。曼聯今季成績咁好，主要係主客演出平均，10場作客贏咗8場。至於兩隊近11次交手，曼聯錄得10勝1和未輸過。論近期狀態同往績，今場唔揀「主客和」曼聯客勝，都對唔住自己。
富咸聖誕快車期間已連和3場，面對查爾頓同車路士都能夠末段追和對手，取得寶貴1分，證明佢哋後勁唔錯。除此之外，富咸今季主場對倫敦球隊成績唔錯，淨係輸過畀車路士，贏過阿仙奴同查爾頓。以富咸近期狀態要贏佢哋都唔係咁易。屈福特今季作客認真差勁，除咗未「開齋」之外，仲試過6場無波入，加上經常末段失手，長買佢對家一定有所斬獲。今場都唔例外，簡單任務揀「主客和」富咸主勝。
阿鵬
有線球彩台主持
電郵：[email protected]