意大利西西里島嘅黑手黨出晒名，上個月挨近年尾治安突然惡化，島上球隊巴勒莫亦不能倖免，球會體育總監科斯基就喺平安夜當日收到個生羊頭，真係大吉利是，擺到明恐嚇！
據講科斯基當日收到一個寄至巴勒莫嘅包裹，打開後發現一個血淋淋嘅羊頭，求大俠即時諗起電影《教父》入面將馬頭塞落仇家被窩嘅一幕；咁黑手黨係咪因為近排聯賽第3嘅巴勒莫成績滑落，累佢哋輸錢而出手恐嚇呢？
會長：巴勒莫市的恥辱
求大俠覺得未必，因為意大利黑手黨唔似九流黑幫輸錢發爛渣，而且成績差應該將羊頭送去教練古度連屋企先啱。意大利傳媒就猜測，可能係因為巴勒莫會方決定停止畀黑手黨免費波飛所致。
究竟黑手黨仲有冇霸王波睇呢？好難！科斯基一啲都冇被嚇倒，仲話唔知邊啲白癡送咁嘅聖誕禮物，佢當係開玩笑，羊頭已掉落垃圾桶，件事已經成為過去。一向炮仗頸嘅球會會長森柏連尼亦批評件事係巴勒莫市嘅恥辱。
不過，黑手黨始終唔係人咁品，何況你在明時佢在暗，巴勒莫會方都係低調啲，將事件交畀警方處理，如果唔係第日速遞個人頭嚟就無謂喇！
「一個城市嘅聲譽需要每一位市民一起來建立，黑手黨不斷搞事，巴勒莫成績再好都冇用！今次羊頭，唔知下次係咩呢？」