家姐Ivy前日帶埋囡囡Stephy去海洋公園，想睇「聖誕全城hohoho」嘅幻影冰上騷，點知中午12點幾去到，公園職員話：「今日派晒飛喇！」4歲嘅Stephy簡直係晴天霹靂，Ivy嬲到出煙：「唔係每場開場前先派飛咩！」兩母女之後面黑黑去玩真雪。
一向路見不平嘅我打電話去海洋公園問，公園話呢個禮拜開始，冰上騷派飛嘅程序有變，以前一日四、五場嘅表演，每場開場前派飛，每場都好多人排隊，所以改為一次過派全日嘅飛。
呢個安排對住得遠嘅人唔公平，好似由粉嶺去要個幾兩個鐘車程，唔通要清晨六、七點出門口咩！提醒blogger，想睇冰上騷嘅惟有早啲去撲飛，或者上網睇咗仲有冇飛先去。成日話自己服務香港人嘅海洋公園，咁嘅安排係咪要改？
逢周一至周四刊出