球員轉會市場今日重開，正當車路士班主阿巴莫域治都大嗌縮水之際，國際米蘭老細莫拉堤話嚟緊1年準備7,000萬英鎊（約10億港元）買人，真係豪喇！而頭兩個動作就係斟碧咸過檔同挽留費高喇！
莫拉堤忽然豪爽唔係車胎生意賺大錢，而係08年係國際米蘭成立100周年，咁大日子當然搞大佢，更何況AC米蘭同祖雲達斯都處於內憂外患之際呢？
傳與14間球會爭碧咸
不過，我求大俠想提醒各位國米球迷唔好開心得太早，因為過去莫拉堤愈燒錢成績愈差，「球星黑洞」個名就係咁嚟嘞！所以呢，當聽到莫拉堤咁雄心壯志揼成10億港元，真係要念定經、拜定佛喇！
佢首個羅致目標相信會係皇家馬德里嘅碧咸，呢位「萬人迷」同球會續約談判近乎破裂，皇馬都想1月賣佢走，費事7月轉會一個崩都得唔到；但係，聽講現時有成15間球會排住隊買碧咸，包括有大水喉射住嘅利物浦，莫拉堤都唔使旨意平平哋執佢返來。
蠱惑仔就最鍾意遇上大豪客，國際米蘭翼鋒費高之前傳去沙地阿拉伯加盟伊蒂哈德，莫拉堤已經嗱嗱臨搵佢傾偈作挽留，仲話願意同呢位34歲老將續約兩年至2009年㖭！
講真，費高已經步入掛靴階段，如果國米依然覺得冇佢唔得嘅話，就證明呢支球隊嘅管理同人才培養都有問題。而且，費高頂得順中東嘅氣候咩？莫拉堤，咪俾人當水魚先得㗎！
「肯使錢對球隊好緊要，不過要使得其所先得，如果唔係等同掉落鹹水海。莫拉堤咁高調晒荷包，小心俾人當水魚㩒啊！」