賭王何鴻燊同四姨太梁安琪所生嘅17歲愛女超盈，一直被傳鍾意黐住同性朋友。不過，大前日馮仁昭喺銅鑼灣就見到佢同一男一女好友歎茶，見到佢勁冧同行嘅不羈少年，莫非佢真係聽媽咪話轉性？
大前日晏晝4點幾，着住低腰褲嘅超盈同一男一女朋友喺銅鑼灣皇室堡嘅茶軒歎下午茶，只見超盈好好胃口，心情唔錯。其間超盈攞手機自拍，又猛幫同行嗰位扮到好不羈嘅少年影相，然後好開心咁睇番啲手機相，似乎好冧不羈少年咁噃。
「佢正常嘅」
到大約6點幾，佢哋就分道揚鑣，超盈同女仔friend去咗銅鑼灣地帶一間舖頭同一名打扮男性化嘅sales朋友猛打牙骱，之後就走去皇室堡嘅Azonaa02掃貨，買咗件外套後就坐保母車離開。當部車駛到波老道時，忽然唔見超盈蹤影，但就竟然見到賭王出現，莫非兩父女約咗喺呢頭見面？
另外，四姨太梁安琪喺前晚除夕夜，帶超盈同囝囝去金鐘港島香格里拉酒店出席派對。梁安琪話新年願望係股市繼續升。問佢帶埋超盈嚟，係咪想介紹男仔畀佢識，梁安琪話：「咁就要你哋（指記者）介紹吓。」記者同梁安琪講笑話：「我哋會介紹正常男仔畀佢識噃。」四姨太聽到後，搞笑咁捉住個女話：「佢正常嘅，佢正常嘅。」
