昨日凌晨12時，全城市民齊聲倒數迎接07年的一刻，大批明星名人空群而出，殺到各大蒲點盡興狂歡，尤其女藝人更主動出擊拖仔喪蒲。女子組合Cookies餅女楊愛瑾（Miki）偕「妖版霍啓山」到數碼港歎粵菜撐枱腳，共迎新年來臨，但對方轉頭竟相約另外兩餅女吳雨霏（Kary）和傅穎（Theresa）蒲吧，一夜間嗒盡好餅。另一方面，薛凱琪（Fiona）則跟實緋聞男友房祖名到中環四季酒店開P。
三位Cookies餅女楊愛瑾、吳雨霏和傅穎，昨日凌晨為迎接07年各有節目。
前晚約11時，Miki以一身成熟打扮，偕一名脂粉滿面、貌似霍啓山的男伴在數碼港姬子皇朝高級粵菜撐枱腳，其間二人偕一女伴到戶外煲煙時，「妖版霍啓山」冧得Miki笑至見牙唔見眼，後者更情不自禁拖實對方臂彎，表現親暱。
轉場攬Kary友
至凌晨12時，Miki和妖版霍啓山齊乘的士離開，但後者在凌晨2時又相約Kary和Theresa到許志安緋聞女友細佬在中環開設的Sup1酒吧開P，更在場內和同行的女伴擁抱，同場還有當晚較早時間陪林苑出席四季酒店派對的側田，他更飲至爛醉。
不過Miki昨日在電話中提到相約男伴夜蒲一事時說：「佢係我朋友嘅表弟，啱啱喺外地返嚟，我哋成班都識佢，當佢細佬看待咋，前晚我哋係去數碼港參加朋友聚會。」
此外，Miki昨偕Theresa、Stephy和方力申到尖沙嘴出席活動時，談到被雜誌刊登與柯有倫唱K的親密照一事，她說：「部相機係柯有倫嘅，但我覺得唔會係佢嗰邊漏出去，唔知係咪台灣地震震咗啲相出嚟。」
採訪：娛樂突發組、林妙萍、顏英儀、馬建華
攝影：陳順禎、仇志德
