眨眼間，二○○七年已經降臨，人人都話二○○七會係一個好時年，繁榮持續，唔會係一九六七、一九八七，一九九七嘅翻版，而係類似一九七七。記得香港經濟喺七四年跌入谷底，恒生指數插水式下降到十二月嘅一百五十點，七五年香港慢慢企起身，一九七六年經濟大躍進，增長番16%，一九七七年持續旺氣，直到一九八二、八三年遇上佳寧風暴及九七談判，香港經濟先至沉咗落嚟。四十年來，四次逢「七」，一吉三凶，希望今年會係一九七七咁吉。
單係睇數據，睇政治氣候，二○○七年應該唔會曳嘅，市面上眾多豬年命理書之中，只有楊天命嘅《豬年運程》（第二十三頁）夠膽預測「代表香港之領導者，於本歲中將會在某些壓力下，『聲稱』要棄位而退。」不過楊天命又話，此乃可能「以退為進」，仍然留任，政治風波好快會平息。即使係有政治風波嘅話，香港非一人之城市，邊個做領導人，大家都唔使驚。
純睇經濟，○七年主題曲係（一）通脹，（二）人民幣升值。通脹因素有（a）流動資金太多，貨幣供應有增無減；（b）輸入通脹，如果美元繼續疲弱嘅話；（c）成本上漲包括各項費用、租金及人工。綜合而言，通脹率由現時嘅2%升到3%，不足為奇。與此同時，香港可能唔會等美國減息，自己會偷步減息，構成負利率（利率減通脹率）局面，回復九十年代嘅情況。
負利率帶來嘅效果，顯而易見，就係資產價格上升，豪宅尤其升到脫節，股票亦都會升，但升幅集中於資金追逐嘅Ａ、Ｈ股，升到爆煲為止。
曾特首競選連任，十分篤定，佢面對嘅挑戰就係避免盛極而衰。一九九七之時，佢係財政司，受到金融風暴嘅深刻教訓，○七年通脹，負利率可能捲土重來，股市豪宅升到飛起，你估佢會唔識驚咩，未到七月一號，相信佢已經基於上次經驗，度定應付爆煲嘅方法。