新一年，又係大事回顧嘅時候，娛樂新聞真係鑊鑊新鮮鑊鑊甘，我哋特地選出最印象深刻的八粒星，為佢哋嘅大件事，度身訂做8味菜，幫佢哋展望將來。
記者：林佩婷、趙珮倩
攝影：周旭文、黃子偉、楊錦文
示範：
（Ａ）翠亨邨（尖沙嘴）主廚冼金堂師傅（23762882）
（B）豪庭都會酒樓戴傑豪師傅（25672699）、
（C）讀者陳小姐
部份資料提供：香港註冊中醫莊惠玟、註冊營養師陳國賓
Part1︰最Hurt大事
紅顏惹禍百合靜心
需時：15分鐘
價錢：$25/2人
材料：鮮百合2両、荷蘭豆1両、木耳5錢、芹菜2両（切條）、甘笋數片、黃耳5錢、鹹豬肉3両（切片）、馬蹄粒/油/薑汁酒/水/生粉水/鹽各適量
調味：上湯/蠔油/糖各適量
做法：薑汁酒加水煲滾，加百合、木耳、馬蹄、黃耳及鹽略煮撈起。猛火炸鹹豬肉，加調味大火煮約2分鐘，倒入其餘材料炒熟，生粉水埋芡。
官恩娜台上被強吻，對方坐幾耐監都有陰影，食百合安神定驚好過。
傷得徹「底」香蕉CheerUp
需時︰10分鐘
價錢：$6/2人
材料︰香蕉1條、砂糖/油各適量、生粉2湯匙、麵粉2湯匙、鹽1/8茶匙、蛋白3隻
做法︰將生粉、麵粉及鹽篩勻；蛋白打至企身成忌廉狀，加入已篩勻的粉料，輕推成蛋白糊；燒熱油，香蕉切細片搓圓，沾上蛋白糊，炸約3分鐘成硬身，撈起隔油，撒上砂糖即可。
鄭希怡慘被錢嘉樂扯甩褲有排Down，原來香蕉有泛酸等成份，係人體的「開心激素」。
Part2︰紅與黑
最紅灰姑娘羊肉助雙喜臨門
需時：20分鐘
價錢：$80/2人
材料：新西蘭羊仔鞍4件、南瓜6件（每件約1吋×半吋）、鹽/脆漿粉/水少許、美國楓葉蜜糖3安士、油適量
做法：南瓜沾上開好的脆漿粉，炸至金黃色放碟。文火煎羊鞍約5分鐘後落鹽，倒入美國楓葉蜜糖，再煎約1分鐘即可。
很多人都期待徐子淇幾時為李家生個仔。李生食羊肉喇，增加精子活動能力。
黑臉巨星火龍果美白
需時：20分鐘
價錢：$25/2人
材料︰雞扒150克、火龍果1個、松子2湯匙、蒜茸/薑茸各1/2茶匙、青豆/洋葱碎/西芹粒/紅蘿蔔粒各適量、鹽少許
醃料︰糖1/3茶匙、生粉/生抽各1茶匙、麻油/胡椒粉各少許
做法︰拍鬆雞扒後切粒醃好；起鑊炒松子；火龍果開邊起肉切粒；起鑊炒雞丁，將熟時加其餘材料炒勻（果肉後下），加鹽調味。
章子怡成日被轟黑面，多食火龍果，維C豐富抗衰老，愈食愈白愈好心情，唔好黑臉喇！
Part3︰轟動戀事緋聞
打得火熱合桃壯陽
需時：15分鐘
價錢：$25/2人
材料：油條1/2條（切薄片）、合桃3両（用糖膠炸後撒芝麻）、哈密瓜/蜜瓜肉各1磅（切條）、芒果1/2個（切絲）、海蜇/火鴨絲各2両、檸檬汁少許
醬汁：花生醬1湯匙、麻醬2湯匙、水2湯匙
做法：海蜇及熟火鴨絲加入醬汁攪勻，伴以其他材料，灑上檸檬汁。
男歌手愛配女模，郭富城及熊黛林打得火熱，Aaron工作重要日忙夜忙，少啲精力都唔掂。合桃補腎補腦啱晒。
緋聞纏身木瓜補腳撇狗仔
需時：20分鐘
價錢：$45/2人
材料：夏威夷木瓜1個（切1/4做蓋，主部份挖出肉待用）、牛仔柳3両（切粒）、青紅椒各11/2両（切粒）、蒜頭4粒（切片後炸至金黃）、油適量、上湯3両、生粉/水各少許
調味：豉油1/2茶匙、糖1茶匙
做法：慢火炸牛仔柳，將熟時加木瓜肉猛火略炒。隔油後加蒜片、上湯及調味慢火煮，埋生粉芡收亁水，最後放入木瓜內即可。
馬德鐘結婚多年仍緋聞不斷，原來木瓜可補筋骨，多食跑得快，撇甩狗仔隊。
Part4︰最攞命搏
肥杏KeepFit腰果雲耳炒蝦仁
需時：30分鐘
價錢：$35/3人
材料：蝦6両、腰果1両、鮮百合1個、雲耳2錢、蜜糖豆6両、蛋白1隻、鷹粟粉/糖/鹽各少許
做法︰鷹粟粉、糖、鹽及蛋白醃蝦仁10分鐘；百合汆水；雲耳浸透；腰果慢火泡油；起油鑊炒熟蝦仁，再將蜜糖豆、雲耳和百合炒熟，加蝦仁兜勻，鷹粟粉水埋芡，鋪上腰果即可。
胡杏兒𠵱家最緊要keep，呢味餸高纖少澱粉，蝦仁又低脂。
破膽笨豬跳食辣伴酒壯膽
需時：15分鐘
價錢：$40/5人
材料﹕金菇200克、肥牛1/2磅、粉絲適量、玫瑰露酒1湯匙、花雕紹酒2湯匙、雙蒸200毫升、沙嗲醬2茶匙、辣椒油2茶匙、指天椒1両、糖2茶匙、鹽1茶匙、雞粉2茶匙、水300毫升
做法︰肥牛及金菇分別汆水；粉絲浸透；把所有材料放鍋，倒入全部酒及調味，滾起即成。
若陳冠希再笨豬跳，最啱食辣加啲酒令血管擴張，提神醒腦。
