DVDBoxset要$1,500，仲要本地製作？憑咩呀？咪《西樓錯夢》推出嘅DVD版，龍劍笙同梅雪詩擔正演出，加埋師傅白雪仙領軍，人馬係粵劇界精英，DVD全球限量發售2,888套，每套印上編號，一套4隻DVD收錄晒全戲共7個劇目，極有收藏價值。一般DVD會有Bonus，睇番鏡頭以外嘅內容，《西樓錯夢》DVD版內全無，完完整整咁收錄舞台劇內容，對於鍾愛此劇嘅戲迷，就可以過足癮，不過對睇過現場嘅觀眾，DVD版就少咗其他元素，其實，起碼都要加番白雪仙、龍劍笙同梅雪詩嘅訪問喇！記者：許福合
