喺香港做地產代理一定要攞牌，但如果換個形式，只係做買賣雙方嘅「紅娘」，事成之後分「茶錢」，咁又算唔算犯法呢？
本身唔係地產經紀嘅KingDong喺《香港討論區》話，佢朋友有個大陸客預算用1800萬元左右，喺渣甸山或者跑馬地物色一個大約2000呎單位，咁啱KingDong有位世伯放緊個渣甸山盤，叫價1600萬元。
呢位世伯同KingDong講，叫佢做「紅娘」，帶個大陸客嚟睇樓，仲話如果個單位可以賣到1650萬元以上，就將多賺嘅樓價分一半畀佢；就算喺1650萬元以下，都會畀「茶錢」佢。KingDong後來真係介紹世伯同個大陸客認識，𠵱家雙方仲傾緊價錢。
唔收錢 都犯法
KingDong強調自己冇參與議價，亦唔會幫買賣雙方搞文件合約，但究竟咁樣算唔算做緊地產代理工作，連佢自己都唔清楚。KingDong好想同世伯分杯羮，但又驚咁做會犯法，所以唔知點算好。
據地產代理監管局發言人話，按《地產代理條例》第15條，任何人士或公司未領有有效地產代理牌照，而從事或經營地產代理工作，或以地產代理身份行事，或向公眾顯示自己可以地產代理身份承擔進行地產代理工作，不論是否獲得報酬，都屬刑事罪行。
發言人仲提醒，在物業交易過程中，任何人士或代理蓄意向買方傳達一個虛假嘅出售價，以圖獲取中間差價，該名人士亦可能觸犯了《盜竊罪條例》及《防止賄賂條例》。奉勸網友KingDong都係唔好以身試法啦！