好多公司都已經出咗年終雙糧或花紅畀僱員，唔少打工仔除咗會用呢筆錢交稅，部份銀根鬆動嘅，都會買份厚禮獎勵自己。
gnarler喺《MSN討論區》問，用現金買部新車係咪明智之舉？網友gonegolfing話要視乎個人嘅自制能力，如果車主係一個揮霍成性又或者唔識投資嘅人，一筆過畀晒錢會較穩陣，起碼就算失業都仲有架車揸手；否則，架車用分期付款，然後將現錢拎去投資互惠基金或股票，隨時可能賺多架車返嚟！
落地即貶值
ARCHIRIEtheDRAGON唔同意畀現金買車，佢話如果真係不幸失業，寧願手持一大叠銀紙同一架可能因欠供款而被人拖走嘅車，都唔希望無晒啲錢，剩得架供滿、但已經貶值嘅車。
alinal11就話，相信唔會有人將供車當成一項投資，因為架車需要消耗大量銀彈，無論係分期定一筆過用現金買新車或二手車，甚至有人送架車畀你，車主往後仍要大破慳囊為架車做維修保養、買保險同入油，仲未計架車會折舊同貶值。因此，如果要自掏腰包買車，用錢愈少愈好，手頭若有足夠現金，盡量避免額外支付任何利息，但緊記要有流動現金作儲備。
globalbiz亦同意，擁有私家車是一項消費，所以車主千萬別將流動資產投進會貶值的項目中，寧願將手頭現金撥作另類資產投資，以賺取更高回報。再者，如果車主只係假日才駕車外遊，租車可能更化算。事實上，買車定租車、一筆過定分期付款抵，真係見仁見智，最重要都係了解清楚自己嘅經濟能力！