香港樓市兩極化，豪宅個價同啲摩天大樓一樣高不見頂，但普通住宅就谷極唔起。其實，唔只香港係咁，美國樓市都唔好得去邊。
喺《MSN討論區》，網民Reach001話：「過去9個月，加州聖迭戈嘅樓價跌咗約一成。其實成個加州嘅樓價早前升得太急，脫離基本因素，例如平均樓價超過平均年薪4倍已經好牙煙；仲有加州浮息按揭貸款係全國最高，一旦樓按供款急升，好多人會頂唔順。」
invested仲話：「美國加州正帶領全國樓市崩潰，因為以『按揭供款中位數』佔收入比率計，洛杉磯、聖迭戈、三藩市、聖何塞等地區嘅都高達50%，而比率超過25%已經好危險。」wiseman69估計：「加州部份地區嘅樓價會回落到2002年前嘅水平。」
叫人低吸大整蠱
面對樓市放緩，除咗消極埋怨，globalbiz話加州建築商正諗緊辦法度過難關，搵地產專家同記者唱好樓市，話樓市已經見底，樓價就快會回升。EnigmaticPumpkin亦話，樓市「好友」認為樓價下跌只係短暫性，並建議趁低吸納，就好似喺2000年科網股爆煲時，叫人趁低入貨一樣──不過，美國好多科網股現時仲未見家鄉。
美國樓價過去幾年錄得雙位數增長後，06年第3季出現急煞車，廣泛地區房屋銷售同樓價都下滑。《華爾街日報》調查發現，三分二經濟師認為，美國樓市最壞時刻可能已過去，但估計07年樓價依然會有負增長。