中旅（308）由今年11月發力，短短個幾月狂升50%，買九洲發展（908）博中旅翻版。九洲喺祖國主打「主題公園」業務，兼屬市場熱炒嘅紅籌窗口股，遲早辣起。
九洲現價0.8元，相對NAV1.1元，折讓27%，而中旅現價係NAV嘅1.38倍。又中旅06年度預期PE講緊27倍，九洲預期PE講緊15倍水位，九洲平到痹。
再講，10月中有報道，話九洲正就酒店及旅遊業發展進行土地規劃，唔排除引入世界級品牌酒店合作。家陣喺九洲度假村附近，就有多達170萬平方呎待開發土地，project應該唔嘢少。九洲有消息跟尾之餘，市值遲早三級跳。博九洲翻半番見1.2元，到時，目標價都係同NAV睇齊，預期PE22倍。
卜蜂過殘有得諗
卜蜂（043）經呢半年倒水，現價0.189元仲殘過沙士期（0.3元水位）。又卜蜂貴為祖國具規模及領先飼料及畜牧企業，加埋泰國華僑大孖沙謝中民家族做大股東，現價P/B只係1.2倍。
再睇睇喺聖誕節上市嘅類近股份天康畜牧（深A：002100），家陣相對招股價已經翻一番。畜牧股大受歡迎，天康嘅P/B講緊4、5倍，卜蜂相比下，真係過殘。博卜蜂P/B上番1.5倍，價見0.225元，短打回報20%，有魚有肉。
錢雋