呢頭先放低隻聖誕火雞，今日又話除夕大倒數，嗰陣HolidayMood好似開香檳一樣噴晒出嚟！論節日氣氛、講飲講食，今晚點都要落「老蘭」玩到癲！怕排隊排餐懵？逼餐飽？今日特選嘅老牌California同THAILEMONGRASS，都預備咗特色美、泰兩國除夕大餐，更正係今日訂枱，今晚可以有特別VIP通道直上蘭桂坊食飯兼倒數，唔使逼時又唔使爭！
記者：朱崇德
攝影：陳偉強
Model：Naomi、ChiChi
美式菜加白松露油
California係蘭桂坊最元老級餐廳，83年開業，整加州菜而出名，店內有個大窗口，酒客話：「望住大街入口人潮Fever，我就歎住酒、索住雪茄，今晚係今年的最後機會嘞！」
唔好以為美式加州菜淨係得薯條漢堡包，喺加州荷李活學廚嘅行政總廚Herny話：「其實近年美國菜嘅潮流已經滲入法、意、日等多國元素，今晚大除夕，美國人會出街搵間好餐廳，覺得人頭湧湧先有氣氛！」
以歷年慣例，今晚8點封路，9點過後休想入老蘭；不過餐廳同有關部門已達成協議，已訂枱者，餐廳在封路後有專人接送，真係幾周到。
薄切三文魚配白松露菌油
明顯滲入意菜風格，以矜貴的白松露菌浸成香油，再加入鮮三文魚伴食；三文魚喺邊？原塊薄切平鋪碟面橙色嗰塊就係，切得咁薄，就係為令白松露菌油更入味，入口更鮮香。伴菜仲有沙律菜加鮮番茄，好健康。
朱古力合桃薑餅
除夕餐中有兩道甜品，一是芒果雪葩；另外不得不提壓軸甜品──薑餅，係美國人賀節必食，中間夾雜朱古力及合桃，好有口感。
除夕餐單
‧魚子醬煙三文魚毛士‧
‧巴馬火腿伴蜜瓜‧
‧鮮蝦粟米甜椒多士‧
‧波士頓龍蝦湯‧
‧薄切三文魚配白松露菌油‧或‧煙鴨沙律配香橙甜酸汁‧
‧芒果雪葩‧
‧煎鱈魚柳配紅花香草汁‧或‧香煎牛柳伴鵝肝意大利雲吞‧
‧朱古力合桃薑餅‧
‧咖啡或茶‧
$788/位
California餐廳酒吧（25211345）
地址：中環德己立街30-32號加州大廈地下
座位：90人
平均消費：$120-$250
至平正位玩倒數
正宗泰國人新年應該係潑水節，THAILEMONGRASS行政總廚成哥話：「不過近年泰國經濟好咗，旅遊區又多西方人聚居，所以曼谷呢啲經濟主區喺新年都玩得好癲吓！」
以往好多人有個錯覺，鬼佬新年當然要食西菜：「可能就係大家食得太多西菜，所以好多人都轉投食其他國家菜過年！」喺度食有個特色，就係有個半開放玻璃窗陽台，向下直望亦係德己立街倒數位，人聲喧嘩，居高臨下！唔使逼之餘一樣感受節日氣氛，「更重要係我哋個除夕大餐只係$388，平盡成個老蘭！」最平至好位，絕對諗得過。
炸香草龍蝦雲吞
原隻龍蝦拆肉做成炸雲吞已經相當豪氣，由於肉質新鮮，除入口夠彈牙之餘，鮮味的肉汁從牙縫間迸射而出，加面層香脆的雲吞皮，口感層次變化極豐富。
炭燒美國牛柳串伴鮮胡椒汁
以美國進口的鮮嫩牛柳做串燒，肉質鬆軟，伴菜有菠蘿、青椒等，食得健康。
焗香蕉布甸
戲肉是皇帝蕉加綠豆打成的布甸，亁身冇水份，香蕉的香甜美味完全保留。
除夕餐單
‧炸香草龍蝦雲吞‧或‧燒雞肉青木瓜沙律‧
‧冬蔭公湯‧或‧香茅椰子海鮮湯‧
‧炭燒美國牛柳串伴鮮胡椒汁‧或‧泰式燒大頭蝦‧
‧鮮蝦金邊粉‧
‧椰汁鮮蘆笋‧
‧焗香蕉布甸‧
‧咖啡或茶‧
$388/位
THAILEMONGRASS泰國餐廳（29051688）
地址：中環德己立街30-32號加州大廈3樓
座位：137人
平均消費：$160-$280