葵芳邨葵明樓倫常慘案中，涉嫌將妻子掟落樓後跳樓自殺的男子李順聯，本月11日曾向葵仁樓地下的香港家庭福利會葵涌南綜合家庭服務中心求助，但社工將他的個案評估為無即時危機。昨傍晚6時，記者以求助人身份前往該中心，以下是男記者與中心女義工和女社工的對話。
記者：我想搵人幫手。
義工：你搵開邊個姑娘㗎？
記者：我都唔知，我屋企發生咗啲事，睇吓有冇人可以幫吓我。
義工：今日啲姑娘冇返喎，星期一係假期，你星期二再嚟啦。
記者：我有急事，仲有冇社工喺度，我想同佢傾吓。
義工：仲有一個姑娘喺度，你等吓，我去叫佢。
（大約一分鐘後，一名年約40歲的女社工走出來接見記者。）
社工：先生有乜事吖？
記者：我屋企有啲事，想搵社工幫手，呢度可唔可以幫忙解決家庭問題㗎？
社工：可以，你有乜事吖，有關部門嘅社工今日放假，你最好星期二再嚟。
記者：我同老婆發生咗啲問題，有啲唔開心。
社工：情況緊唔緊急㗎？
記者：都可能幾急㗎。
社工：如果急嘅，就打電話報警或者去醫院求助，𠵱家有關社工唔喺度，冇可能做到任何嘢，如果唔急，可以星期二打電話嚟，到時同姑娘傾吓做埋登記。
記者：需唔需要填表㗎？
社工：唔使填表嘅，我畀小冊子你拎返去睇吓啦。
女社工稍後將兩本小冊子交予記者，將記者送出門後，叫他周二再來。
本報記者