虎豹別墅、灣仔喜帖街，連天星碼頭都消失了，生活在香港的你與我，無奈接受這種變化。長居美國的香港設計師譚燕玉（VivienneTam），感受同樣深刻，失望的她痛心香港政府「為咗錢，冇咗歷史空間」，而她仍然堅持回港買布、在母校理工教學。
土生土長的香港女設計師譚燕玉，八、九十年代以毛澤東肖像服飾，以華裔設計師身份晉身國際舞台打出名堂。近年以美國為基地的她，仍保留她的香港心、香港情，一年總會回港數次找尋靈感，如往昔未發迹般在南昌街買布，以及在母校理工大學做客席講師等。
街頭尋寶成絕響
VivienneTam早前回港，在長沙灣showroom接受訪問時，直認對香港有許多忘不了的情懷，但對近年的政府的表現感失望，她說：「我對政府拆天星碼頭好失望！香港好多有特色嘅舊地方都拆晒，我每次返香港，四圍嘅環境唔同晒，上海街冇晒寶尋，尖沙嘴碼頭面目全非，賣國貨嘅中國國貨呢類好地道嘅店舖，同埋街景都冇晒，只有大型shoppingmall。」
鼓勵新人闖天下
VivienneTam滔滔不絕說：「政府應該帶頭保護呢類文化，做啲嘢啦，唔做，反而拆去咁多文化建築，為咗錢冇咗我哋嘅歷史空間、文化。」她感慨官商一樣，香港商家為賺錢，只顧起樓，不理環境、市民生活，她說：「每次返嚟就覺得香港愈來愈迫、空氣愈來愈差，冇乜空間畀人，連植物都少咗，好似剝削市民享受的空間。」連聲「失望」之後，VivienneTam揚言香港的改變「令我少咗好多靈感同空間」。
對香港政府失望，對鼓勵創作的熱情VivienneTam卻不減，她認為香港的年輕設計師應該在歐美闖天下，不顧一切、衝破自己的框框，開拓國際視野。她說：「創意係最重要，抄襲會失自我，你可以話『我要抄，因為我要賺錢生存』，但你賺嘅係快錢，你嘅作品係冇意義。」
做瑜伽走出陰霾
長居紐約，VivienneTam也曾經歷紐約人最驚心動魄的911，她說：「911對我影響都好大，我嘅apartment當時就係對住世貿中心，我初時以為係龍捲風，親眼目睹呢一切之後，我個人都變得好depressing，後來靠做瑜伽、專心設計先走出呢個黑暗。」採訪：JessicaNgan
攝影：ChanShunChing
