投資大哥W犧牲中午睡眠時間，下山到中環搵埋左丁山一齊食晏，難得之至。大哥W炒股三十年，八六年時曾以二十萬元做孖展，賺到一千萬元，但八七股災一役，一千萬變番一百萬。幸好冇蝕入肉，仍有本錢東山再起，之後學精咯，掌握及時上車落車之竅門，到𠵱家已經印印腳嘆世界，朝朝晨運之後，睇齊報紙及股市網各類消息、評論，到咗十點就對住電腦搏殺，上午收市後就小睡去也，唞足精神到兩點半再投入戰場搏過，日日如是。收市後重有大把時間讀公司年報。
近日A股H股升到飛起，問大哥W賺到幾多？大哥W話：「慚愧之至，呢個月我何止跑輸大市，直頭蝕咗錢，因為我覺得H股太貴，買唔落，好似中人壽咁，成七十倍P/E，儍咗先至會買。投資講長期，一兩個月作不得準。譬如打麻將，日日打十六圈，打足一個月而贏晒嘅，先至係真正高手，淨係打四圈，一個月打一次，俾新仔摸到鋪大三元，老雀輸清光，唔算羞恥吖，我炒股賺咗二十年，算係咁咯，呢排一於唔同佢癲。」識得咁講，都要有定力先至得，否則手痕痕，守唔到齋缽，咁就英名盡喪。
大哥W有度好，自己唔買，唔會勸別人唔好買，上個月佢同資深大炒家食飯，大炒家話買入2628者會過唔到年，當時2628只係企喺十七個幾，至今已升咗五成有多，入貨者，過肥年至真。學曹仁超話齋，升市莫估頂，謹慎者靜靜行開算嘞，唔好指指點點發預警。
人壽保險公司有價，估值處處不同，分析師、投資者好難有共識。例如AXAAsiaPacific向瑞信集團買入Winterthur嘅香港壽險業務，作價約二億四千三百萬美元，你話平定貴呢？總之識做壽險生意者應該知道自己做緊乜嘢事，當人人都話壽險公司收入穩定，增長可觀，中國大把前途嘅時候，壽險公司就成為投資者至愛，與2000年時大家追捧dotcom，道理相同。