蘇玉華船踭鞋穩陣
「兩個月前喺日本買，個款無論襯裙、褲、casual或者隆重場合都得，雖然個踭有4吋高，但因為係船踭，承托力好，就算企咗幾個鐘都唔會覺得攰，又夠穩陣。我本身好鍾意鞋，屋企放滿兩個櫃，已經多到唔可以再買，但係見到呢對鞋，最後都忍唔住手。」
朱凱婷穩重黑白配
「呢套首飾係我爸爸送畀我嘅，係我第一次鍾意Chanel飾物。我一向係Dior擁躉，覺得Chanel太成熟，難得今次搵到一款少女味比較重嘅飾物，顏色圍繞黑白，感覺冷啲，但又沉實一啲，因為我經常做司儀，唔可以太誇張。」
胡琳吊帶夠晒Man
「平時着衫冇乜飾物配襯，可能會單調，用吊帶嚟配襯，可以將下身嘅裙或者褲連接上身衫，令到整體有連貫性，我鍾意用吊帶嚟襯牛仔褲，因為我男仔頭性格，唔想扮到咁女仔，吊帶就可以凸顯出男性化，女仔用吊帶，出嚟嘅效果可能比男仔更加好，因為男仔用咗可能會老成啲。」
劉浩龍至Sharp醒神鞋
「我本身好鍾意着Converse嘅鞋，着乜嘢衫都係襯呢隻牌子嘅鞋。我屋企就有數唔到咁多對Converse，我冇理乜嘢限量版同埋絕版，我最鍾意係着sharp顏色，我個人比較浮誇，好似我呢對紫色，甚至粉紅色我都有，總之愈搶眼我就愈鍾意。」
採訪：楊潔雯、魯萍、張俊銘、卓寶花
