「不要老是行走，以免思想跟不上腳步」，聽說這是非洲土著的諺語。
非洲話我們不會，先停下來卻不難。
除夕興倒數，數來數去數到十年前廿年前，最記得的是甚麼？
日子一天天的過，到底又是為了甚麼？十年後廿年後會如何？
古巨基回望過去展望將來：想念嫲嫲興歎愛得太遲；
未來欲以黎明為榜樣捧新人，也要有個快樂家庭，帶着兒女暢遊大世界。 撰文：蔡如玉
回顧篇
2006年 34歲 首做導演求完美
「今年算好充實，最開心係有機會第一次做導演，拍咗個音樂電影，同埋做咗張碟，頭三首歌都唔係講愛情，尤其《愛得太遲》呢首歌，由一首歌變成一件事，出埋音樂電影同小說。第一次做導演真係份外緊張，我不嬲好鍾意企喺鏡頭後攞角度，諗吓可以點拍嘢，可能我又係獅子座嘅關係，自己又份外奄尖，即使係第一次，都唔會畀藉口自己有任何瑕疵。嗰排係全年最辛苦嘅，緊張得嚟又要成日捱眼瞓，做後期剪接時，因為budget關係，要喺貓頭鷹時間先開工，日頭又要做其他宣傳，成個星期都捱通宵，完成後足足瞓番24小時。」
1996年 24歲 執偉仔二攤翻生
「95年係我事業低潮期，本來好怕96年都會係咁，點知畀我遇到首《第二最愛》，發掘自己唱假音嘅一面，呢首歌係張佳添寫嘅，我後來先知原本畀梁朝偉唱，但佢監製最後冇揀到呢首歌，於是有個同事攞咗首歌畀我監製聽，佢覺得好適合我唱，於是我咪唱咗囉，原來歌手同歌曲都要講緣份。」
1986年 14歲 別了嫲嫲感遺憾
「嗰年我應該讀緊中三，呢一年發生咗件好唔開心嘅事，我嫲嫲過咗身，由出世到大都係嫲嫲湊我，爸爸媽媽要返工搵食，我記得有一日放學返屋企，見唔到嫲嫲已覺得好奇，只好等爸爸媽媽返嚟，點知到夜晚佢哋返嚟，先話我知嫲嫲喺屋企跌親，去到醫院後都救唔番，我嫲嫲80歲身體仲好健康，但就咁過咗身，我好愕然，夜晚瞓覺時匿喺被竇喊，嗰陣我諗番好多嫲嫲同我嘅回憶，我一直好耿耿於懷見唔到佢最後一面，好遺憾，我好掛住佢！」
大計篇
2007年 35歲 專注拍電影開騷
「我1月中開拍一部新戲，同蔡卓妍合作，跟住會出唱片，下半年開演唱會，希望年尾前出到張國語碟，對上一次出國語碟係05年，嗰次叠埋廣東碟同年底好多宣傳一齊做，好辛苦，今次會專注啲，我諗到時要四圍飛去外地宣傳，好多時間唔喺香港，Paco話嚟緊都要我比以前花多少少時間喺電影上，希望樣樣順利啦。」
2017年 45歲 開公司培育新人
「如果到時我仲有能力做幕前嘅話，我會兩邊兼顧，做埋幕後幫人監製唱片，我仲想做導演，同埋會有一個屬於自己嘅label，發掘新歌手，好似黎明咁提拔一啲有潛質嘅歌手，我真係幾欣賞同佩服佢，雖然佢出碟冇以前咁頻密，即使減少幕前嘅活躍度，都仲幫緊同推動緊個樂壇，我希望10年後我有能力畀機會新人，幫到手推多啲有實力嘅人上位。」
2027年 55歲 老婆仔女遊世界
「呢個年份好似係細個睇機械人同高達、或者未來戰士時睇到嘅年份，原來眨吓眼就會到，我諗到時屋企會有幾個好似高達嘅機械人幫我洗碗，我會有一仔一女，放假就帶老婆仔女四圍旅行，一家人環遊世界係我目標，可以睇晒成個世界。」
攝影：仇志德 協力：馬建華
