在精緻的圖文紀念冊《武生王靚次伯》中，除了四叔生平和舞台電影全紀錄外，還看到珍貴的戲班宣傳廣告。二三十年代很多藝人喚「靚×」，掀翻抄錄，除靚次伯外，還有靚朱、靚榮、靚少佳、靚新華、靚順財、靚坤山、靚中山、靚文、靚紅玉、靚冠、靚少華……
「新×」亦不遑多讓，靚次伯的兄長便是新太子卓，此外，新靚昭、新貴妃文、新靚仙、新有、新珠……近代的有新馬師曾、新薛覺先、新白駒榮、新芳艷芬、新劍郎……
喚「靚」，是自戀也是自信。喚「新」，則表明後學、新浪，亦藉此引起聯想，事半功倍。
戲班中喚「新」的多，用「蓋」的少，京劇藝人也有。但若非本姓，改名「蓋×」，總覺帶點戾氣，似踢館，欠大度。明明是模仿，蓋不住，徒添笑柄。有本事自成一家也罷。「聲架×」、「公爺×」則威猛自恃。
通俗響亮的藝名，如子喉七、猩猩仔、飛天本、陳皮梅、紅光光、淡水元、小非非、娣仔、大牛潤、反骨禧、嫦娥英──生旦（男花旦）淨丑末都在。後來發現一位袁臘腸，笑得我。