正如林海峰一開始就講：「嚟睇得我演唱會，起碼三張幾嘢，唔少人都係聽軟硬天師聽大。」聽番兩人幽默搞笑對答，好似變番細路咁返老還童，今次演唱會DVD包裝精美，收錄多名嘉賓的表演，仲有軟硬寸人精句，DVD中又加插後台情況，睇晒演唱會內外面，好過睇現場！
記者：許福合
舞台前後
寸嘉賓精句
軟硬請來嘅嘉賓，除咗唱番首歌，自然唔少得被軟硬玩餐飽，暗寸明寸，以下就係佢哋嘅精句！
黎明快歌高手
「黎明除咗係最靚仔唱片公司老闆，佢仲係唯一可以企定定唱快歌嘅歌手，真係高人。」
黃貫中唔係反日
「Beyond係咪不和？人哋娶個日本老婆，婚禮上就唔見你，係咪反日先？」
張學友掌聲多過軟硬
「成個演唱會，只有一個人出場時，掌聲多過我哋，佢就係歌神張學友！」
陳奕迅開Show少一場
「軟硬開演唱會？開表演會至真嘛！」
「陳奕迅開9場，我10場，多你一場！」
古巨基訪問軟硬
古巨基講到曾訪問過軟硬，仲被玩咗一大輪，阿葛話：「有咁嘅事，我唔記得嘅！」
楊千嬅最好打
楊千嬅一出出，又笑儍咗。「楊千嬅可能係現時最好打嘅女歌手！」
《longtimenoseesofthardhongkongcoliseum2006》
DVDBoxset包裝包你話靚，內容包括有3隻DVD以及精美相集，仲包括曾喺演唱會出現嘅波鞋公仔，不過好貴。
