假如你每日都有睇娛樂版，肯定三日唔埋就會見到畢彼特（BradPitt），但喺佢齣新戲《巴別塔》（Babel）入面，你唔會見到平時有型有款嘅畢仔，戲中佢將會脫胎換骨，唔單止變番一個真正嘅演員，仲會交出佢從影以來最震撼嘅演出。 撰文：戶川淳
將於下月11日上映嘅《巴別塔》，所有焦點除咗集中喺其中之一嘅主角畢彼特之外，識睇戲嘅觀眾都一定會留意導演艾力謝路依拿力圖（AlejandroGonzalezInarritu），呢位墨西哥導演雖然只係拍過《狗男女的愛》（AmoresPerros）及《21克–生命可以有多重？》（21Grams）兩齣長片，但已經技驚四座，前者當年更獲得奧斯卡及金球獎最佳外語片提名，令佢被捧為新一代電影大師。
引發骨牌效應
同兩齣前作一樣，《巴別塔》嘅故事同樣由一宗意外引發而起︰一對於摩洛哥旅行嘅美國夫婦（畢彼特及卡塔布蘭切CateBlanchett飾演），因為妻子意外中槍，引發一連串骨牌效應嘅事件，結果當地一對小兄弟因為呢次槍擊，連累全家被視為恐怖分子。
至於畢仔夫婦嘅墨西哥女傭，又迫不得已要帶住主人嘅一對子女跨越美國同墨西哥邊境，與司機（加爾卡西亞般奴GaelGarciaBernal飾演）展開一場沙漠逃亡之旅；而地球另一邊嘅日本，一位商人（役所廣司飾演）嘅聾啞女兒（菊池凜子飾演），以身體去換取別人嘅愛，但原來摩洛哥開始的一連串悲劇係因為呢個日本家庭而起。
演技獲得肯定
艾力謝路指片中悲劇嘅真正源頭，係主角溝通上出現問題，不過問題本身並非出於地域文化嘅差異，而係來自人性。過往演開娛樂片嘅畢仔，今次再唔係演平時嘅型男英雄，本片題材嚴肅之餘，角色又要表現出極度傷痛及絕望，對佢嚟講係一次演技大考驗。結果畢仔演出受到影評一致激賞，話佢終於回復一位真正演員嘅形態，難怪畢仔成功憑本片贏得金球獎最佳男配角提名。