每到年底，歌手們的世界幾乎全被各頒獎禮淹沒。今年可以預期古巨基將滿載而歸，他於日前的新城頒獎禮中獲頒七個半獎項，僅次於大贏家劉德華，卻贏了勁敵李克勤和陳奕迅（Eason）。
基仔又是歌手們最在乎的《勁歌》「最受歡迎男歌星」及「金曲金獎」大熱，有競爭就有是非，爭獎之聲不斷，基仔謂只會視作趣聞，並自覺與華仔、克勤及Eason等的關係不受影響。
贊成良性競爭
基仔說：「我哋並唔係報道所指有不和，大家彼此一條心為樂壇努力，花邊新聞影響唔到我哋，好似早前我同Eason返內地頒獎禮，未出台時，我哋喺後台打機，幾咁開心。」基仔認為現今歌手是良性競爭，並非要你死我亡，而且每位歌手都有獨當一面的才華，尤其近年有實力新人湧現，令樂壇又漸趨多姿多采。
談到《愛得太遲》這首金曲，原來背後有段古，基仔指今年母親節前，他的一位朋友緊張張羅送給媽媽的禮物，到母親節當日，朋友在家等到媽媽回來，滿心歡喜準備送禮，媽媽卻說很疲累想先洗澡，誰知兩母女就此天人永隔，媽媽因突發性疾病在浴室暈倒，送院後不治，平日好端端的媽媽忽然辭世，母親節禮物送不出去。
基仔說：「發生咁嘅事，我個心好唔舒服，我可以想像到我朋友有幾傷心，佢由醫院返到屋企對住份禮物，個畫面會係點？係只差一秒，心聲都已變歷史。後來我將件事話畀林夕知，佢寫咗呢首歌出嚟。」
基仔每次唱此曲都會想起家人，早前他於澳門開演唱會，就特別邀請父母到澳門一遊，他說：「平時工作忙，好耐都冇時間陪屋企人食飯，𠵱家唱起呢首歌，就會提我要得閒打個電話畀佢哋，佢哋都會多咗主動打電話畀我。」最好笑是古爸爸看到歌詞後問基仔：「乜我有好多白頭髮咩？」從此，基仔與家人由以往含蓄性格，轉而放開懷抱關心對方，他說：「唔好計獎唔獎，今年唱呢首歌，我嘅得着有好多。」