今日之後，全港食肆禁煙，左丁山從不吸煙，當然歡迎，但身邊有唔少朋友，無煙不歡，佢哋以後搵哋方食煙就麻煩咯，不如戒煙啦！現時大家都視吸煙為政治不正確，電影電視中唔會出現男女主角吸煙嘅場面，否則一定畀反吸煙人士痛罵。其實導演編劇自律反而唔反映現實，有違表達自由之宗旨。
前幾日美國前總統福特逝世，美國報紙發表文章圖片紀念呢位已被遺忘嘅「蝦碌」總統，其中一張圖片係佢在白宮內與兩位年青要員開會，一位係幕僚長切尼（現副總統），一位係國防部長拉姆斯菲爾德（剛退休不久之布殊內閣國防部長），福特口含煙斗，以今日眼光視之，福特好唔政治正確。好彩，報紙重未自律到要向照片施「電腦手術」，將福特口中煙斗移走。
一月一日開始禁煙嘞，由幾多點開始？政府人員對《南華早報》講得好強硬：午夜十二時！嘩，唔係呀，晚上十一時五十九分三十秒後蘭桂坊、灣仔……各大餐廳酒吧開始倒數，大量人客飲酒互相祝賀，更有唔少煙民在內，如果二○○七年一月一日凌晨十二時零一分開始，食環署人員就到餐廳執法，容乜易引起無謂紛爭？餐廳羅睇完《南早》報道，話希望執法人員有啲commonsense，唔好懶醒咁在十二時零一分入餐廳拉人，等到一月一日午市開始先至執法，唔會有人話特區政府弱勢呀嗎？
財務Ｍ聽完餐廳羅咁講，醒起佢有四位外滙dealer（交易員）朋友在太古廣場四樓某上海菜餐廳食午飯（dealer在早上十一點半就去食飯，一點返銀行開工），因時間早，只得佢哋一枱人，突然間隔籬嚟咗十位內地同胞，人人拎住兩三袋太古廣場戰利品，一坐低就叫十罐啤酒，然後人人抽煙。一位交易員要求夥計：「我哋一點鐘就走，唔想吸二手煙，坐去另外一張枱得唔得？」夥計一味話No，仲潤交易員一句：「忍到一月一號啦！」交易員為之氣結。嗱，聽日就一月一號嘞，睇吓呢間上海飯店如何應付愛吸煙嘅內地大款先。