提起姚樂怡,麻甩佬只諗起樣靚身材正,但一如其他在無綫「浸大」嘅藝人一樣,出街拍戲搵真銀時,演技發揮總比所謂偶像級實淨得多。電影《跑馬地的月光》食住電視劇《十月初五的月光》餘威上畫,同場張智霖、蘇永康全被打低,惟獨姚樂怡憑此劇跟金紫荊最佳女主角獎沾上邊。今日做訪問,樂怡悉心打扮,誇張3D指甲加3"高跟鞋,由頭到腳犯晒揸車大忌,但見佢舞住架BenzCLK230殺落黃埔,左穿右插有井有條,不經意顯露「辣味」,原來花拳繡腿背後,總有點實力支持。
文:吳心彥
攝影:陳陶鈞
新牌揸車一味辣
外表嬌滴滴嗲聲嗲氣,姚樂怡畀人柔弱、事事靠人嘅感覺,不過一講到車,佢就話絕對唔靠人,由買車到保養都係自己話晒事!樂怡踏入18歲已急不及待考牌,更急急花幾萬蚊買人生第一架車──豐田Corolla。
「呢架FirstCar只係揸咗幾個月就無揸啦,之後買過Civic、開篷FordEssort、MR2、寶馬325i、Jeep、Estima小霸王、波子、Benz(ZipCar),最新就係𠵱家呢架BenzCLK230!」記者坐喺樂怡隔籬,見佢揸車手法利落,開車時又細心地左望右望,於是安心坐車,誰知樂怡突然劈頭一句話:「我都試過揸大膽車!」
「嗰時揸棍波車好大膽㗎,買MR2嗰時,架車細細部好好揸,點知有次沙田隧道出九龍,睇少咗前面個落斜大彎位,當時夠膽死仲一邊傾電話、一邊『甩』住入彎!」唔識死嘅樂怡,家陣諗番起都心驚!
唔記得架車泊喺邊
揸車無數,威水史冇乜,蝦碌就一籮籮,「試過架車行行吓無油停低,原來唔記得入油,最後要拋錨行去買油;又經常唔記得架車泊喺停車場邊度,入閘卡又唔見,最後搞到罰錢。最嚴重嗰次,泊完架車去開劇,點知Bobby(歐陽震華)話有條友泊完車冇掹匙,失魂到爆!聽聽吓發覺唔對路,摸吓個袋唔見車匙先知原來係我!」
「小時候望着父親揸棍波車,已令我開始愛上揸車,更曾夢想當的士司機。長大後習慣了數年棍波車後,還是自動波較適合懶惰的我。」
有樣有演技
平治CLK 毋懼金融風暴
平治CLK這款雙門Coupe跑車,首代於97年推出,而現時熱賣中的第2代則在03年登場。當年行貨抵埗時適值金融風暴,經濟蕭條但仍吸引到車迷追捧,因而令98年全年總銷量達308部。
平治CLK230Kompressor規格
引擎:2,295c.c.直4DOHC
馬力:193ps/5,300rpm
扭力:28.6kgm/2,500rpm
傳動:5前速自動波