除夕夜開Party，當然唔少得要整番兩杯Drinks助興湊熱鬧。高鈞賢（Matthew）在加拿大讀書時，曾經在咖啡店做兼職，沖得一手靚咖啡之餘，對調酒亦好有研究，得意之作係用紅酒溝草莓醬冧女友，令佢High到一發不可收拾……不停咁隊杯酒。嗱嗱嗱，趁住今晚咁高興，一於偷佢師整番杯畀愛侶，齊齊摸住杯底倒數迎07，仲唔冧晒？
記者︰趙珮倩
攝影︰楊錦文
場地提供︰ClubHouse（21161688）
服裝提供：THEFIRSTSHOP（27837100）
甜蜜FuzzyMixBerry
需時︰8分鐘
材料︰草莓果醬6安士、草莓4粒、藍莓11/2安士、梳打水/紅酒份量隨個人喜好
做法︰先將草莓及藍莓洗淨，放入攪拌器，加入草莓果醬，攪拌約1分鐘；把1安士混好的果醬放入調酒器，加入紅酒搖勻後倒出，最後倒入梳打水即可。
健康MixBerryYop
需時：8分鐘
材料：草莓果醬6安士、草莓4粒、藍莓11/2安士、原味乳酪4茶匙、奶3/4杯、冰1杯
做法：先將草莓、藍莓洗淨，放入攪拌器，加入草莓果醬，攪拌約1分鐘；將21/2安士混好的果醬、加入奶、乳酪和冰，以攪拌器攪拌半分鐘即成。
熱情Sinking
需時：5分鐘
材料：冧酒1安士、熱情果甜酒1安士、橙汁4安士、石榴汁1/2安士、冰適量
做法：先將石榴汁倒入酒杯；把冧酒、熱情果甜酒和橙汁倒入調酒器，加冰搖勻，最後隔冰倒入酒杯。
三色Feather
需時：5分鐘
材料：伏特加/Gin酒/白糖水各1/2安士、橙皮酒/荔枝甜酒各2安士、檸檬汁3安士、冰適量
做法：橙皮酒倒入杯；把伏特加、Gin酒、荔枝甜酒、檸檬汁、白糖水及冰倒入調酒器搖勻，隔冰倒入酒杯。
薄荷Ba-la-ba
需時：5分鐘
材料：Gin酒/威士忌/薄荷酒各1/2安士、檸檬汁/白糖水各1安士、菠蘿汁4安士、冰適量
做法：將所有材料倒入調酒器，加冰搖勻，最後隔冰倒出即可。
Matthew女友 不沾紅酒都失守
每逢過節，Matthew班朋友都爭住請佢去搞Party，皆因大家都知道他識整嘢飲。他試過Show秘技嚟冧女，前女友唔鍾意紅酒陣味，於是他就將紅酒加草莓醬同梳打，結果前女友勁鍾意。而8歲就移民加拿大的Matthew，就鍾意溝奶飲。「由細到大都好鍾意飲奶，而嗰邊啲乳酪好平，所以就成日飲乳酪溝奶，不過𠵱家比較鍾意飲紅酒，加上入行後唔鍾意出街，得閒會喺屋企紅酒溝白酒慢慢歎！」