以創作歌手自居嘅「汁甜」，早排再被網友踢爆抄歌，雖然佢依然死口唔認，話從來冇聽過人哋首歌，但日前關仁同朋友傾開偈，佢話大半年前左右，喺銅鑼灣間唱片連鎖店撞見汁甜，當時佢揀緊啲英文舊歌CD，左摷右摷睇咗足足10分鐘，然後好似執藥咁執咗10幾隻CD，雖然老友睇唔到佢手上有冇揀到早排俾人話佢抄嗰隊黑人組合嘅CD，但汁甜咁有興趣聽舊歌，但就冇聽過嗰隊黑人組合嘅歌，關仁就真係覺得難以置信囉！
不過，話時話，老友當日無意昅到汁甜買咗隻披頭四嘅精選CD，唔知會唔會又係用嚟抄歌呢？分分鐘喺佢嚟緊嘅新歌入面抄番一兩句都唔定。
「冇公德」抄得醒
其實汁甜師傅「冇公德」，一樣抄歌抄到離晒譜，但佢就抄得醒啲，唔會成段咁搬過去，呢樣嘢汁甜就應該學吓啦！
Textby關仁