今日係2006年最後一日，今季嘅英超賽程亦已進行剛剛超過一半，回顧過去半季，大家覺得賽事精采嗎？
可能對投注失利嘅球迷嚟講，諗番過去幾日賽期唔見錢，怨氣仲未消呢！小妹因為主持球彩節目，為增投入感，間中亦會成為「熱烈投注人士」，積極參與（呵呵！）。不過，知道英超快車好多時係投注陷阱，近日已單純從欣賞角度睇波。
自從知道中國隊隊長鄭智被查爾頓睇中，以借用形式加盟半年後，都好期待睇查爾頓嘅比賽。上季睇中超時，都見過呢位中場喺山東魯能時嘅厲害，同𠵱家查爾頓班中場岩布斯、堅斯舒夫同賀蘭特相比，鄭智絕對值得獲正選。況且簽入鄭智嘅目的都係搵佢救亡啫！
球品有待改進
不過，佢要把握機會表現自己之餘，球品方面就有待改進。鄭智嘅臭脾氣都幾出名，上屆亞冠盃佢唔服球證判決，向球證吐口水！亦曾多次牽涉入暴力事件中，希望佢唔好因為呢啲劣行，喺英超舞台上丟中國人嘅面啦！
WENDY
由歐國盃EuroBabes，變身球彩台受歡迎主持。