平安夜同除夕夜，相隔只有一星期，亦係每年Party界大搞嘅日子。大部份蒲友呢兩個星期最忙。今晚最重要節目，點計都係倒數！三五知己，一齊叫一齊嗌齊齊開心迎新年！今年香港Party界就大玩扮嘢服裝，你可以選擇扮皇帝、羅馬士兵、埃及妖后；如果唔鍾意着古裝又不妨試吓扮鐵金剛加邦女郎。今個除夕夜玩住「帝國驕雄大戰國產007」，玩住Cosplay去倒數，點都好過去Party齋飲酒咁悶啦！今次推介兩間Party都係想你笑住去迎新年，相信總有一間啱你心水啩！
記者：羅灝汶
攝影：陳盛臣、何家亮
4餐廳打通玩古羅馬派對
上年除夕夜，位於灣仔新鴻基中心嘅4間特色餐廳包括dv8、SukhoThai、VICEROY同MILANO搞咗個聯合國大型派對，05主題係「中東之夜」，所有客人都打扮成中東國家人物。負責人表示：「上年我哋推出化裝派對，估唔到有咁多客人支持，特別係外國客人，佢哋以好多新奇又得意嘅打扮，感染到保守嘅香港人都玩得更放，所以我哋決定每年除夕都會搞主題派對，今次就用上古羅馬同古埃及時期做主題，希望客人喺造型上可以有更多突破啦！」再接再厲舉行嘅「CLEOPATRA之夜」，鼓勵女士們化身成「埃及妖后」、男士就變成「帝國驕雄」，盡情將古代有型之士搬上身，而且除夕夜當晚4間餐廳都會粉飾成古代背景，氣氛一定正！計我話，男士們玩外國古裝扮相當然係揀英雄武士，再唔係就扮法老王，外形簡單不過夠晒煞食，話唔定撞啱有靚嘅侍女㖭！而女士們不妨扮吓美艷歌姬，裝扮Sexy包保搶到收視，如果個個都扮埃及妖后咁就無癮啦！除此之外，4間餐廳會採用劃一自助餐，而共用嘅OpenBar都會任飲，加上有Liveband同DJ捽碟，個套餐都幾多嘢噃！
中印泰式自肋餐
必食推介：茄醬三文魚長通粉
茄醬非常清甜，加入三文魚同長通粉，夠鮮味！
中東免治羊肉卷
外脆內嫩，唔會感覺到羊羶味，香口得來肉汁一樣保留得到。
任飲除夕特飲
CleopatraSpecial
取名就係來自「埃及妖后」，藍色雞尾酒迷人得來令你想飲多幾杯。
CLEOPATRA之夜
灣仔港灣道30號新鴻基中心2樓
查詢：Joseph：25981222/
Simon：25987222
日期：2006年12月31日
時間：今晚8:30pm開始
每人收費：$1,088（包自助餐及任飲、只限成人）
去老蘭扮國產鐵金剛
講到除夕倒數好去處當然唔少得蘭桂坊！今年就有Club舉行扮嘢派對，當中CClub就搞咗一個以「鐵金剛」為主題嘅新年派對，CClub負責人Simon：「每年我哋都會有一個主題除夕派對，今年就用上Sexy邦女郎加鐵金剛為題材去吸引朋友入場；因為來年係2007年，所以扮特務007就完全食正晒整個主題喇！」除此之外，CClub仲有大大個舞池，而且請來駐場DJSirScratch到場捽碟。DJSirScratch非常有份量，2000年佢曾於英國DMCDJ大賽中得到第5名，屬於世界級打碟專家，當晚就會大玩HipHop同SexyHouse音樂，型男索女可以大跳辣身舞，講氣氛一定無問題！今次Party要各位打扮成007同邦女郎，女生們打扮只要一味玩Sexy就Fit晒邦女郎造型啦，相反男士們就認真難以突圍，事關每代007都係「踢死兔」死硬Fans，如果想令靚女們留下印象，當然要花心思啦！唔夠其他「007」大隻，不妨玩搞笑，今日我哋就示範一個全新「國產007」孖煙囱造型，淨係擺個靚仔Pose都贏晒啦！
CClub（25261139）
地址：中環德己立街30-32號CaliforniaTower地下
日期：2006年12月31日
時間：今晚10:00pm
每人入場費：$200（不包飲品）
你想去乜化妝派對？
