每到年尾，打開電視翻開周刊，統統是06回顧。我們亦不例外，今日來選選06年十大潮事。BapeStore中環再開幕、Playstation3都排晒長龍，的確係城中潮事，但07年你仲玩唔玩？Wii無排長龍迫爆玻璃，但全家大細同度佳節狂玩PartyGame。潮友話，唔買點知啱定錯，啱！但細個老師又話：讀歷史係為免「重蹈覆轍」。喺07年來臨前的一刻，回顧十大，07你會唔會慳番啲無謂錢？
記者：錢靖雯
攝影：譚盈傑
No.1：Wii打碎家庭代溝
大概從Playstation升至霸主地位開始，好多人都忘記了「任天堂」三個字，更加忘記任天堂是做遊戲（紙牌）起家的（而SONY是做電晶體起家的）。所以任天堂從來唔會同你鬥運算率，但做的遊戲會比你的好玩！從05年推出NDS開始已迷倒一眾少男少女，日本銷量更加將男性向嘅PSP技術性擊倒。新機Wii主打多功能同全方位動感遊戲，遊戲定位更加年齡無視化，絕對要俘虜所有年齡階層人士，已知好多阿爸阿爺同阿仔阿孫，一齊喺屋企打保齡打高爾夫球。政府與其賣廣告叫人「愛錫家人」，不如考慮資助家庭買Wii啦！
一向熱愛打機嘅Yumiko早喺個多月前已經揚言要將Wii入手，貪佢出嘅遊戲多元化、可愛之餘又可以減肥瘦身，啱晒貪靚一族。Yumiko：「有兩個朋友都咁啱送咗部Wii畀我，之後勁多朋友要求上我屋企打機，興奮之餘又可以幫我輕鬆減壓，一定係今年必買新機！」（$2,080/Dreamstore（92808472）灣仔188商場G04舖）
No.2：猿人店襲中環
06年4月1日唔只係愚人節，仲係猿人節，因為猿人Bape總店再開幕。大家都忘記了早幾年由葛民輝帶領，BusyWorkshop在北角玩低調，結果低調離港。今次由I.T代理，Nigo（長尾智明）高調得多，專誠訪港為新舖主持開幕禮，開幕明星一大堆。Fans呢？列陣排隊，有人帶備摺櫈、飯盒，排足一星期就係為咗……炒貨。至開幕早上有大約400人排隊。畢竟今時今日的Fans不再純情，捧你場鍾意你牌子，唔只買來着，仲要喺當中搵到着數。
No.3：Levi's神豬俠侶網上宣傳
今年一輯神豬俠侶網上視頻，令到一眾網友頭都大晒。一段又一段的短片吸引了很多網友瀏覽，但大家怎樣也估不到這原來是Levi's的宣傳手段，最後揭曉那刻實在係「玩死」兼講句「欽敬」！國際品牌兼全球第一牛王Levi's都喺網上搞免費宣傳，當然矚目，更令到好多中小企業注意到網上的宣傳世界係何等有效，昂貴廣告之外覓得一條出路。《蘋果日報》財經版《金手指》專欄作者孫柏文︰「這短片十分之成功，能確實捉緊Targets。後生仔日日都會上網，必然有機會睇到，傳播極快。這是現在宣傳的唯一出路。」
No.4：日本漫畫改編電影打入MK
06年，兩齣日本漫畫改編電影上映，而且大受歡迎，一拍兩集。《死亡筆記》（DeathNote）係日本漫畫史上最快突破100萬本銷量嘅漫畫，漫畫版05年已經大熱，連「潮人」藤原浩在專欄都推介過，潮人一人手上有一本。日本電影公司耗資20億日圓（約1.3億港元）拍真人版電影，打破了同類型漫畫最快改編成真人版紀錄，單單日本票房突破24億日圓（約1.6億港元）。至於《NANA》，第二集亦瞬即開拍，兩個娜娜換了一個，只保留中島美嘉。咁又係，你無發覺自從NANA流行，旺角街頭少了Lolita，但多了MKPunk的「中島美嘉」？
No.5：軟硬復合搵錢Fans受落
錢錢錢！講明無對話多年，講明復合搞騷只係由於俞琤開聲，結果突然變成「好兄弟」。你賣集體回憶，香港觀眾畀錢亦唔介意。一開10場、再加唱片、特別版普通版唱片（唱片+沙灘拖都有賣）、Tee、首飾等。最好嘢係無綫，趁機翻出《軟硬製造》DVD，零宣傳費賣個滿堂紅。咁大家要買集體回憶，復刻之餘無理由唔買原版啫！
No.6：PS3開賣依然排長龍
SONY的PS3一出依然鬧得翻天覆地。世界各地機迷為了先打為快，不惜在開售前露宿街頭。香港首賣會只賣200部，一小時內就賣晒，好多機迷買唔到，只好去水貨舖捱貴機，炒到七千蚊部。美國更有男童為搶同學仔部PS3，而被警方擊斃！官方表示至年底全球已賣出200萬部，短缺情形將維持到明年第二季。
No.7：一線名牌旗艦店搶灘
06年，眾多一線品牌先後隆重登陸香港，如全世界最大獨立DiorHomme專門店、亞太區最具規模Tod's旗艦店、Chloe旗艦店等。開幕總是星光熠熠，各大名流的紛紛到賀，可見香港作為大中華潮流/消費龍頭地位。由此可見中國果然係一個不容忽視的巨大市場，而香港只係小小一塊踏腳石。
No.8：劉米高波鞋炒近萬
炒到成萬蚊一對嘅波鞋唔係經常有。講緊嘅係香港著名玩具設計師MichaelLau幫Nike設計嘅DunkLowProsb。胡桃木紋波鞋配木盒，仲送埋個6吋Figure，行貨價$1,999炒到近萬，叫潮友示範點樣儲錢買對唔會着嘅靚鞋。全球只有香港Nike旗艦店有得賣，但最抵死係對鞋限量，官方又唔肯公開有幾多對！
No.9：香港街頭教父Tabo去世
80年代香港，一個日本人為香港帶來了「街頭文化」，91年Tabo與拍檔創立板舖BFD後，正式將滑板及HipHop文化帶入香港，李璨琛、LeeHawk同DJTommy等人都係飲BFD奶水長大，冇Tabo嘅出現，香港街頭文化亦無咁嘅發展。之後Tabo創立Fiberops，惜Tabo剛於12月14日逝世。
No.10：F.P.Journe中環開店
去年我們選了RichardMille做十大之一，現在要買RM據聞要等兩年！今年F.P.Journe來港開專門店，牌子成立只有７年，產量少。01年替的HarryWinston製作OpusI，之後贏取瑞士地位崇高的日內瓦時計大獎男裝錶獎、評審大獎，04年更拿到至高無上的金針獎。提提你，F.P.Journe全球只在日本開設了專門店，中環這間是第二間！
潮人講潮事：DjTommy（DJ）
「06年最潮係台灣地震，令Internet斷纜，大家都要做番半個原始人、個個要用番Modem！」
黃家強
「06年潮事係多咗Band，例如Kolor同農夫……另外我會特別喜歡ScissorSister嘅新Album，佢有Rock嘅元素，但係本身佢係DiscoMusic，有70's嘅Feel喺裏面。佢仲玩咗PinkFloyd嘅《ComfortablyNumb》。」
鄭中基
「06年最潮，咪李璨琛憑《狗咬狗》提名金馬影帝囉！」
