Wii、PS3和XBOX360各有fans，導演李力持就瞓身支持Wii。原因？因為他是任天堂超級fans，由第一代玩到現在，廿多年未停過；佢雙手揸住Wii的手掣已好興奮，更稱Wii係少女殺手，屋企、公司都各有一部，對住100吋投射螢幕打網球，拿上手掣，即時上身，打到肉緊至面容扭曲都在所不計。
記者：馬靜兒
攝影：何家亮
匿埋深圳狂煲
「Wii推出時，我在深圳拍戲，好想即刻玩到，但又無時間返香港買，好『𤷪𤺧』，結果叫同事喺香港買咗帶上深圳畀我。唔使開工，就匿埋喺間房勁玩。日版和美版，我都買齊，因為遲買價錢一定會貴，近聖誕新年，價錢好難回落。我買美版Wii$3,400連薩爾達和WiiSport，買日版Wii就$2,800連手掣和一隻game，雖然好貴，但既然我係忠實fans，唔會計較價錢。」
自稱是任天堂奴隸
揚言自己是任天堂的奴隸，由最早期的紅白機、GameBoy，到NDS，現在的Wii，李力持是忠實fans。以前最愛孖寶兄弟和薩爾達，試過拍戲唔度劇本都要打機，用半年時間取得120粒星。
玩吓自己個卡通look
除了打機，李力持有時都會用Wii睇相和上網，不過，明顯無打機咁熟，有時都要問問身邊的同事點樣搞，佢仲用MiiChannel拼出自己個樣。玩吓玩吓，佢又用Wii上網睇天氣，仲話有人已經諗到方法改裝手掣當mouse咁用。咁勁？「係呀！所以我咁鍾意Wii囉！」
買齊日版美版
點解買晒日版和美版？「在屋企玩薩爾達解謎，唔識日文好麻煩，所以要玩美版，有英文解釋好玩好多。公司則玩日版機，多數玩WiiSport。因為無攻略，只是用體感手掣，公司啲女同事都識玩，Wii就變咗少女殺手。」李力持又話，只要是任天堂開發的，一定會買，因為他認為新game一定研發到更多點用手掣的方法，有新game，唔可以唔買。
打機好肉緊
除了薩爾達，佢都會玩Wario的minigame，但玩得最多應該是WiiSport。對於運動game，李力持話無咩特別秘技，都是用手掣玩，有時要控制力度，難少少囉！但無論玩咩game，佢都玩得好投入，好肉緊。
問：點睇PS3和XBOX360？
答：「論畫面質素，PS3質素的確好高，但遊戲就來去都係嗰啲，唔吸引我。XBOX360遊戲好過PS3，不過，Wii的體感設計係game界一大突破，抵讚。」
問：Wii價錢不斷升喎？
答：「貴都抵玩㗎，話你知，本來Wii價錢只是$1,900，但炒價不斷上升，12月18日機價又升番至$2,680，仲未計火牛和手掣喎！」