牛肉得天獨厚，本身已經是屬於鐵質含量豐富的食物，而且有專門的分級制，所以我們對擁有Prime級的牛肉和霜降牛扒趨之若鶩，今日嚐過急凍成牛肉凍冰條切成的薄牛肉，半冰狀態下的口感軟硬適中，加上一湧而上的牛味，同食霜降牛一樣好享受。
記者︰方綺君
攝影︰陳陶鈞
薄薄雪霜 食極唔膩
嗜牛如命的人，可以數出100個理由點解要食牛，牛肉含豐富鐵質、維生素B6、可增強免疫力……幾多營養上的好處，都不及食牛時軟硬適中的口感，加上留在口腔一陣濃郁的牛味來得吸引。牛肉食法多變︰燒、焗、燜、燉、煮等，生食就最能嚐到最佳牛味，通常吃牛肉刺身都是將牛肉完全解凍，食得多會過膩。
最近收到風，在旺角區開業有12年之久嘅「禮三井」，幾個月前重新裝修再開業不夠1個月，新推出一種全新食法的牛肉，當然要請教負責人冼生，「食牛肉刺身會點酸汁，但係都唔會食太多，因為會好滯。不過比我發現到雪至半冰狀態的牛肉，有𡁻口之餘牛味亦無少到。」店中選用上等的加拿大安格斯牛肉，細心看會看到一層薄薄的雪霜，牛肉的油份封在肉身中，放入口數秒才慢慢感到油份，跟着就滿口香酥的牛味，食過齒頰留香，簡直好似食霜降級牛肉一樣。
牛肉他他刺身$80
新鮮的牛肉刺身完全解凍後入口即溶，牛味一湧而上，不過食得多會太膩。半冰狀態食增加咬感，牛味更勁，亦多了一份齒頰留香的味道。
牛肉撈拉麵$50
牛肉一邊用烤爐燒，一邊塗上特製的燒汁，睇賣相已經知道非常香濃入味。牛肉的油份同口感彈牙的拉麵一齊食，再飲一口豬骨湯，我畀滿分。
火燄左口裙邊壽司$32
一酸一鹹的配搭，左口魚裙邊上放上鵝肝醬及意大利雜菜，經火燄燒過後的左口魚軟綿綿入口即溶，油份又夠多，入口即和鵝肝醬融為一體，口感好特別。
田園之鮭$60
鮭即是三文魚腩，以火燒面後切成厚薄適中的厚度後撒上芝麻，加點用日本醋、日本酒、芥辣、麻油、日本豉油調成的芥辣醋汁，酸酸哋非常開胃。
向日葵卷$75
因為賣相散開擺成向日葵形而得名。半生熟的三文魚外脆內軟，唔食三文魚刺身的朋友都容易入口。
睇路搵食
禮三井（27709710）
地址︰油麻地彌敦道458號地下
營業時間︰星期一至五12:00nn-3:00pm、6:00pm-12:00mn；星期六、日及公眾假期12:00nn-4:00pm、6:00pm-12:00mn
交通︰油麻地地鐵站C出口，步行約5分鐘
座位︰60個
有着數︰凡於星期一至日9:00pm後入座，壽司、刺身和飲品均有半價優惠。
