熱刺今季一味靠主場搵食，連倫敦「1哥」車仔到訪都要輸波，主場已經連贏7場，雖然射手羅比堅尼因傷缺陣，好在貝碧托夫同廸科爾狀態大勇搭夠，近4場主場兩人合共入咗8球，係球隊贏波嘅主要功臣。熱刺今季主場贏盤率相當之高，10場波贏咗8個盤，贏盤率高達8成；相反利記今季主場同作客就相差太遠，主場係英超成績最好嗰隊，但作客就認真唔掂，至今只係贏過查爾頓同韋根，盤路方面同熱刺剛巧相反，10場波只贏得兩個盤。咁嘅表現讓球平手盤，捧熱刺較有勝算。
韋根作客有「福」
睇過「升班馬」屈福特嘅賽事，佢哋擺到明唔夠班，攻守皆弱。以高Q大棍同體力性踢法為主，往往去到賽事末段乏力被對手擊敗。難怪至今只係贏過一場咁大把，唔排包尾先至出奇。
不過今場對手韋根近況都唔係好，已經連輸4場，但輸嘅對手係阿仙奴、車路士同曼聯。睇番韋根今季作客都贏過3場，而聖誕快車期間4場波，最易應付就係屈福特，所以今場係全取3分嘅好機會，平手盤一於揀客隊韋根。
阿鵬
有線球彩台主持
電郵：[email protected]