費高突離國米？係真唔係呀？我求大俠喺伊蒂哈德職員身上打探到，國際米蘭球星費高，下周將正式轉投該沙地阿拉伯勁旅，並獲得一紙半年賺600萬歐元（約6,000萬港元）嘅合約，頓成世界最高薪球員；但其突然為錢轉軚，既令國米教練文仙尼不知所措，也讓球迷眼凸𢱑頭，道義廉恥蕩然無存也！
事成周薪即冠全球
34歲嘅費高近期狀態甚「弗」，頻頻助攻，惟佢鐵定1月離去，毅然放棄高舉意甲、歐冠盃兩項錦標嘅機會，草草簽約伊蒂哈德，說到底都係錢作怪！現時世上最高薪嘅球星係車路士孖寶舒夫真高同波歷克，同為13萬鎊周薪（約200萬港元），而費高轉會後，將獲得16.7萬鎊周薪（約245萬港元）……大佬呀，34歲喇，你話唔吸引就假啦！
事實上，西亞聯賽一向對老餅球星有深厚吸引力，好似巴廸斯圖達、艾芬保、哥廸奧拿等曾前往掘金；而呢支伊蒂哈德相信港人都唔會太陌生，事關佢哋係04/05球季亞冠盃冠軍。
喺石油事業嘅帶動下，西亞聯賽不愁財源，但可笑嘅係，佢哋嘅制度仲係相當兒戲，好似比賽會因一名大牌遲到而更改時間、賽後可用金錢嚟打甩紅牌等，真係得啖笑！
「相比起同期並經常被攞嚟比較嘅施丹，費高今次突然為錢屈膝，骨風、傲氣、性格都被比下去，我求大俠都估唔到費高埋尾都要輸多鑊，唉……」