今個12月算得上係最溫暖嘅冬天，不過韓風連番襲港，阿Rain一話下個月再嚟香港開演唱會，馬上掀起搶飛熱潮，估唔到韓風仲靜靜吹入金融界㖭。
繼上個月港商豪景投資區可華，豪放26億投資濟州主題公園後，今個月華豐紡織又話，要去韓國證券期貨交易所，以韓國預託證券形式上市，獻出咗本港金融界寶貴嘅第一次，成為首家於韓國上市的主板公司。
通告話，華豐揀韓國上市，原因係想吸引國際投資者，同提高股份流通量。不過，做開內地生意嘅華豐，一直都冇韓國業務，同韓國公司又冇聯繫，華華諗到頭爆，都唔明點解會揀韓國上市。
雖然華豐股份成交一直較淡靜，股價亦在三四毫子之間上落，但係上市地點都仲有好多選擇喎。唔通主席蔡振榮係Rain嘅粉絲？