昨日講過交行（3328）股價跌，但係啲P輪就當C輪炒，隻9664升完82%，噚日再升41%，引伸波幅升到88%，真係唔知乜事，見佢咁威，有隻9550學佢亂咁炒，單日升咗144%。
手上持有嘅幾隻股票中交（1800）、中石油（857）同埋中油香港（135）都無乜升跌，年尾計數回報率雖不到100%，但都有9成，尤其係呢個星期買中字派標番個尾會，令到組合回報由8字頭跳到去9字頭。
07年續看好中字派
總結今年個市，一言以蔽之，癲，只要夠癲，夠膽飛身入市，買股票發達絕對唔係難事，問題過唔過得到自己嘅心理關口而已。趙飛雲已算係一個唔多夠膽嘅投資者，身邊朋友，不乏膽大心細，夠勇夠狠去炒輪嘅炒家，𠵱家已經發咗達。
展望2007年，中字派仍然係搵食戰場，因為早幾年印度股市升完一倍又可以再升一倍，中國作為金磚四國之一，有能力升到你唔信，尤其是人民幣不停升值，外資買國企可以賺股價又賺滙價，係最賺錢嘅投機手法，直到爆煲之前，都仲可以同佢一齊癲。
趙飛雲移民在即，今日係同各位親愛嘅讀者最後一次見面，祝大家新年進步，時時好運，後會有期。
趙飛雲