英超愈來愈現實，老闆不斷注資，就連唔識足球嘅曼聯老闆亦唔再吝嗇，肯畀錢買人。注資、買人嘅背後，當然係想贏波帶來更多收入。不過，世事並不是咁如意！
想贏波，就要搞清球隊靈魂──教練嘅工作係乜？其實，一個星期只有一場聯賽，教練事前、臨場、賽後嘅準備工夫，時間有數得計。我覺得，教練應該用最多時間喺球隊未來發展上，簡單講就係「青訓」同「開發戰術」。前者不用多講，而後者則須要配合青訓，呢度真係要向費格遜、雲格學習！
作為車仔球迷，睇番歷史，由上世紀90年代嘅韋斯、到古列治、蘇拿，到𠵱家摩連奴年代，車仔都係有買人文化，自己嘅出品，包括球員同戰術，除咗泰利，就冇乜嘞！
王者霸氣重臨
睇番今晚啲波，我有預感阿仙奴將會令人耳目一新，久違咗嘅王者霸氣會重臨戰場！球員已經磨合成功，唔怪得雲格話就算落後十幾分，都可以追！呢種口氣同自信，不得不佩服！對住錫菲聯，夠晒穩陣！
周鵬
商業1台《球迷集中贏》主持
電郵：[email protected]