近日天氣放晴，偷得浮生半日閒，最梳乎莫過於一邊遊車河、一邊拍SnapShot留念。雖然香港地靚景唔多，不過有時發掘吓，會發覺以前嚷着食糖水同海鮮嘅西貢，估唔到都有咁多Fun！中午先去三杯酒園藝農場影輯靚海景相，親親小山羊兼食埋有機蔬果；玩到黃昏再去另一站影埋夕陽無限好，開開心心消磨半日，回報係一堆唔使高手都影到嘅美麗回憶。
記者：黃婉冰
攝影：伍慶泉
Model：Maggie&權
話明係遊車河兼搵靚景影相，路線同地點當然重要，影相最忌人多車多，所以今日特別介紹兩個靚「景點」─唔使同人爭位影之餘亦好易搵，而且兩個景點都係喺西貢，兩地相隔只不過30分鐘車程，坐上標致307cc開篷車上，遠離市區，一按掣即可把電篷打開，在西貢公路上漫遊，一邊享受無頂樂趣之餘，還可一邊睇四周靚景，的確比其他硬頂車寫意得多，加上近日天朗氣清又不算太冷，打開篷順便吸多幾口郊區清新空氣，幾寫意。
第一站：拍戲勝地 談談情影影相
Thefirststationis「GardenFarm」，位於三杯酒嘅園藝農場，可說是香港其中一個較近市區而又充滿大自然氣息的開放式田園。沿西貢公路經大網仔路，向西駛至三杯酒就到。農莊除設有多項田園活動供遊客玩樂外（供團體預約申請），最特別係農場對正無敵海景，綠色小木橋向海延伸，一望無際海景做Background，不禁令人感覺如置身歐洲小湖泊的氣氛，取景影相一流。過往亦有唔少電視劇、MV在此取過景，影到攰又可以坐在木橋談心，浪漫滿瀉。
記得買埋有機蔬果
農場唔單只種植了有機植物，同時亦係認可喺有機認證中心，所以呢度每日都會有唔同嘅有機食物好似香草、瓜菜、米、新鮮生果賣，價錢比出面有機食品舖頭平啲，星期六、日仲會有多達十幾款任你揀，任你買。食飽蔬果，想更親近大自然，不妨帶埋蘿蔔蔬菜，探吓住喺隔籬嘅「羊生羊太」，仲有隻好Cute嘅豬小姐Barbie，嘟長個嘴問你攞嘢食個樣，真係好鬼爆笑！
第二站：黃昏靚景 影相超浪漫
農場取景仲未夠喉嘅，影到四時多，係時候起程再去另一景點─香港遊艇會。由園藝農場沿西貢公路向西貢方向，車程約30分鐘便到，由獅子會自然教育中心駛入，駛到盡頭，就在香港遊艇會出面，嗰度有個無遮無掩無欄杆嘅位最啱影相。正值五時開始日落時分，在一片橙紅色黃昏景下，幫Honey影番輯日落黃昏照，包佢冧爆。其實該處除黃昏景之外，仲可以用埋香港遊艇會白色小碼頭作背景，效果一樣充滿歐陸情懷，自製浪漫又有幾難呢？
SnapShot秘技
想由朝到晚影到滿意靚相，實在毋須動用萬幾蚊嘅相機，但起碼部DC要配備廣角鏡（Wide），最好具28mm-30mm，建議選購Ricoh嘅GX系列。若想如圖中般影得Mood啲，大可將光圈或快門調高，再以「鹹蛋黃」為重點測光，則可達到人物剪影效果。
試車報告：
今日試揸嘅標致307cc，雖然外形比206cc略大，但又比一般開篷房跑車短小，所以即使遇上迂迴山路都不會出現很大的問題，好似今次的路線中，前往香港遊艇會時，由獅子會自然教育中心一路上，沿途必經又窄又彎的單程路，但一路上307cc依然可輕易應付，加上有紅黑相襯皮椅，望落都幾有跑車Feel。
抵讚：紅×黑車廂有跑味，電篷開關方便快捷，車廂設備亦貫徹歐洲車好睇好用優點，尤其後座獨立恒溫冷氣，開住篷都唔怕坐到身水身汗。
要彈：以2,000c.c.同級車仔來說，起步時略欠爆炸力，而後座在關上篷後略嫌窄了少少，最佳坐車人數都係維持在二人世界會好啲。
Peugeot307ccSpecifications：
引擎：1,997c.c.直4VVT引擎
馬力：143hp/6,000rpm
扭力：200Nm/4,000rpm
傳動：4前速半自動波
車價：$323,800
車輛提供：法國汽車（31181828）