呢個12月，孫柏文已經多次建議大家盡量用今年最後啲交易日去狂歡，因為股票市場已經變成一個瘋狂派對。今日，就係06年最後一個交易日，就算派對未完，大市都應該係時候來一個小休。我講過國企指數已經好似03年12月一樣咁升，所以我亦相信來年1月，國企指數又會好似04年1月一樣咁樣回氣。
大家可能會問：「點解年尾會係升跌市嘅分水嶺？」我可以提供好多原因，有啲甚至可能係啱。
不過，我覺得年尾係升跌市分水嶺嘅最主要理由，係因好多管理普通基金嘅經理，想跳船去對沖基金hedgefund、私募基金privateequity。所以就要盡量谷高今年嘅成績，來一次終極windowdressing，省靚自己嘅紀錄去搵工。就算明知唔扺買，都要繼續去。
到出年1月1日，06年成績塵埃落定之後，先至賣貨。所以我就叫大家買國指認沽證，揸到1月尾，跟住就輸贏都要離場。
我話買認沽證3497嘅原因，係因佢嘅行使價最高。最衰冇國指熊證，如果有，我一定推介。
最後，大家要千祈千祈、記得記得，認沽證有槓桿作用，買嘅時候毋須要瞓身。
噚日，強迫金獻計會主席周永新先生，話因經濟好咗，係時候叫人供多啲落強迫金。先生一定係數學好差，就算以前好，𠵱家已經退步，唔明白乜嘢叫compoundinterest。
孫柏文問周先生一句，後生仔女如果因自我增值或首次置業借咗錢，佢哋係應該：A、盡量減債，去穩袋一定可以節省得到嘅利息？定係B、畀老周你個強迫金一刀切，強迫去買回報率唔穩定嘅基金？孫柏文相信周永新一定唔會/唔識答。
大家因唔可以盡量減債，每年愈滾愈大嘅利息，唔通老周畀番你？我相信一個好似周永新嘅高齡人士，因覺得未來唔屬於佢，所以就要一班未來主人翁供死為止先罷休。