鍾鎮濤（阿B）破產之後一直忙於籌備新碟同溫拿演唱會，佢事隔十年再出新碟《濤出新天》，今日正式推出，首主打歌《日日是好日》前晚喺無綫勁歌金榜仲做咗冠軍歌，佢可謂雙喜臨門。
鋸扒補數
阿B前晚同埋光良、關楚耀等喺將軍澳電視廣播城錄影《勁歌》，無論係fans定現場觀眾，見阿B出場都反應熱烈，事後阿B話：「我好耐冇上勁歌攞冠軍歌。」問阿B會唔會去頒獎禮同人爭獎，佢話：「我冇諗過爭，但做歌唔係得我一個人，仲有好多幕後人，我唔可以自己唔玩，人哋就陪我白做。」
阿B噚日接受商台訪問，佢話《日》曲係自己寫照，佢話：「我唔係儍佬幫主咩？選擇錯，一錯再錯，以往面前咁多嘢揀，冇理由揀個最唔好。」但𠵱家有女友范姜體貼愛護，呢個時候結婚咪三喜臨門？阿B話自己都曾經想向女友求婚，點知食檸檬，佢話：「我試探過佢，但佢唔制，佢咦咦哦哦答我呀！」但為答謝女友支持，阿B請范姜食牛扒燭光晚餐。
另外，前晚出席《勁歌》嘅關楚耀噚日去咗維園做港台節目嘉賓，日前新城勁爆頒獎禮傳分獎唔勻，引起正東同環球唱片公司不滿，拉隊缺席慶功宴，關楚耀就直認話當晚佢同Eason、謝安琪等去咗卡拉OK睇波，冇去慶功宴，佢話支持公司嘅決定，自己都係跟大隊，其他乜嘢都唔知喎！
