周中「拆禮物日」，一個等睇波嘅下晝，無意轉咗台睇馬，乍聽到其中一位評馬人講，謂賭馬同賭波嘅分別，賭馬要場場睇足，賭波就未必；賭馬需要做嘅準備工夫應該多啲，好似賭波買「單雙」咁，邊使場場波都要睇㗎。
前輩呢番說話出發點及主觀角度，係可以理解；但賭波玩「單雙」，都唔一定百分百倚靠運氣噃，有時用嚟做一個保險啲嘅注碼，都幾唔錯㗎。
車仔小勝多捉「單」
自足智彩有混合過關以嚟，筆者都幾常喺其中一關半關，串下「單雙」；出擊角度主要從部份球隊埋手，例如一啲和波專家，好似今季英超聯嘅阿士東維拉咁，「雙」都算係追捧嘅皇道選擇；呢排好多時唔係開贏1:0，就係開贏3:2兩瓣波膽嘅車路士，當然要多捧「單」！
唔計捉路，有時一場波，你覺得和波嘅機會都幾大，但又因為有直播睇，令到落注時心大心細，點解唔試下吼「雙」？「讓球主客和」，有說讓波嗰隊僅贏1球常見，但博呢項嘅「和局」，又係令人睇波時唔能夠感到盡興嘅，下次試下向「單」埋手囉。而且，「單雙」一般都有至少接近1.8倍賠率，分頭都算唔錯。
此外，現今球壇已甚少見強隊逢出場都大勝對手，如果唔係都唔會有咁多上盤客成日喊救命，反而佢哋小勝對手比率就甚高，贏波輸盤就係呢啲。所以，目前英超聯開得最多「單」嗰兩隊，同時亦係喺聯賽榜領先嘅曼聯同車路士！文：華度