港股喺今年倒數「尾二」交易日，升到阿媽都唔信嘅水位過2萬點，但凡有「中」字掛喺心口嘅股份，隻隻都升到唔停，咁出年可以揀邊隻股份？
四叔鍾情抽新股，又啱啱娶新抱，自然唔得閒睬你。不過，香港首富李嘉誠，喺新一期亞洲版《福布斯》訪問中透露，未來最多發展機會嘅，應該係藥物。
超人話，大型藥廠可以利用國內平價嘅生產成本，結合西方嘅品質控制，拓展國內龐大嘅市場，而集團已預備好隨時同藥廠合作，發展國內市場。不過，長和系近年搞嘅新業務，好似長江生科、TOM集團、泓富信託，分拆喺英國上市嘅和記醫藥，同歐洲3G業務都麻麻，係咪值得參考就見仁見智。
佢仲講，𠵱家仍然有參與集團日常業務運作，現時其中一個佢最關心嘅公司，就係加拿大赫斯基嘅石油業務。超人講笑咁話，好多傳媒忽略咗佢私人持有37%赫斯基權益，市值100億美金，仲多過和黃持有35%嘅赫斯基股權。咁你覺得佢睇好石油多啲，定係藥業多啲呢？
電盈背後 真相令人失望
講起今年，自然要提佢孻仔小小超想賣電盈嘅一幕，老竇想出手，但係個仔又唔鍾意，最終成個收購好似鬧劇咁草草收場。有機會同超人訪問，《福布斯》自然唔會放過機會，之但係超人就答得好決絕，話件事已經完咗，不予置評。佢仲話，唔好信坊間嘅種種報道同傳說，又話，若果你知道事件嘅真相，一定會好失望。另外，前關黃陳方會計師行主席，現年69歲嘅關超然，話以私人理由辭任長實非執行董事，比今年已78歲嘅超人李嘉誠仲早退休。
[email protected]