港股以19964完結2006年，單日下跌37點，但全年升幅就非常可觀。呢幾日會有好多專家會做回顧，俊樺今日專心為大家講吓假後嘅部署，原因係炒窩輪只爭朝夕，好多時更只爭分秒。
前日國內電訊股全線異動，昨日得番隻中電信（728）最省鏡，高收4.26元，升5.9%，中電信C輪2137升33%，收62仙，升得比預期略多咗少少，因為引伸波幅升成2%，正股有大成交支持向上破關，下個禮拜二係新年第1個交易日，中電信升破4.40元應該冇問題，破位就推向4.80元，2137可繼續揸。
炒輪其中一個竅門係愈強勢愈啱炒，調整緊嘅正股，收集C輪風險好大，或者應該說值博率唔大，炒輪雖然要講吓運氣，但係就千祈唔好靠晒運氣，因為運氣唔係你同我話事。好似啲保險股咁，中財險（2328）走勢最靚，其他回緊或者整固，遲啲先諗，要炒保險股C輪就要搵中財險嘅C輪入手。
港交所C輪2280：港交所（388）昨收85.50元，升勢停不了，啲投資者愈嚟愈睇好港交所前景，呢啲憧憬絕對唔係一廂情願，睇成交同未來仲會有好多國內企業來港上市，心郁郁想買港交所嘅人會愈嚟愈多。
港交所C輪2280昨收1.68元，槓桿率5.1倍（有效4.5倍），對沖值0.89，假期後引伸波幅應該會跟隨正股升番上嚟，正股升上90元，2280應該喺2.05元樓上，正股升上100元，隻輪應該見到3元，正股跌穿82元止蝕。
俊樺