國內A股近期好似食咗藥，上海A股再升4%，深圳A股升逾2%，其中有唔少股份漲停牌，升幅達到一成，數得出有香港H股掛牌嘅，計有鞍鋼、中國國航、南航同中國銀行。
理論上，國內漲停板之後，再升就要等第二日，即係好大機會下星期仲有得升，但係H股嘅表現卻似乎唔追得上，鞍鋼（347）升5.3%，國航（753）升2.4%，南航（1055）升5.3%，而中國銀行（3988）就升2.8%，當中以國航同中行表現最差。
中行升唔起係慣性表現，而且以現價計，中行H股較A股折讓約21%，同工行（1398）較A股折讓幅度睇齊，計市值、分行網絡同管理質素，點睇都揀工行優先過中行啦。至於國航，現價較A股股價折讓約17.9%，折讓少過同業南航嘅22.4%，因此，即使升得少過南航，純以折讓角度睇仲係南航抵買啲。
時惠去中東掘金
由於原油有價，造就中東經濟發展興旺，個別地區如阿聯酋杜拜，正大興土木發展基建，吸引唔少港商探路掘金，包括在港經營實惠連鎖店的時惠（996），亦宣布在沙特阿拉伯發展零售。睇走勢，時惠過去個多月跌咗50%之後，剛由低位回升，博反彈應該有水位可走，但係呢類股仔千祈唔好買多，兼要嚴守止蝕，一見唔妥就要走。
歐陽風