周末英國波早飛，可向英冠聯侯城及英甲聯基寧咸兩主隊「讓球」平手盤出擊；客場受讓嘅普雷斯頓，亦值一博。
英冠聯球隊侯城，上仗主場輸畀李斯特城，重要係半場贏、全場反勝為敗嗰隻，照計士氣麻麻。不過，呢班波人腳質素其實唔錯，陣中唔少主力擁有英超聯比賽經驗，今輪繼續得到主場之利，迎戰嘅只係近5場不勝球隊般尼，相信侯城吸取過對李斯特城嘅教訓，呢場會小心啲，平手盤捧得過。
黑貓飄忽寧取普雷斯頓
普雷斯頓呢個聖誕新年唔太好受，事關先後撞正高車士打、西布朗及今輪對手新特蘭等實力分子，對新特蘭更係作客，上仗又啱啱作客以2:4輸咗畀西布朗。但係新特蘭近況亦唔算好有說服力，近3仗就只得勝和負各一，始終呢隻「黑貓」教頭堅尼，領軍功力尚淺，無辦法幫球隊保持穩定成績。其實亦都算係今季英冠聯實力分子嘅普雷斯頓，呢場受讓信得過。
英甲聯奧咸今輪繼續作客，上仗作客下游球隊洛達咸，受讓之下開W，3:2險勝；今仗對住實力較洛達咸勝一籌嘅基寧咸，反而無受讓之利，咁就值得睇好主隊嘞。始終呢個聖誕新年快車期，連續作客兩場球隊甚少見連贏，基寧咸唔使讓波值捧。文：華度