戚黛黛、楊洛婷、應屆港姐亞軍周家蔚及季軍呂慧儀，昨日到紅磡出席無綫兒童台「開心KidKid07年」記者會，即場公布07年無綫兒童台的精選節目。
呂慧儀表示十分喜愛小朋友，昨日與現場小朋友玩得很開心，但已有要好男友的她自言未有結婚打算，問到會否生BB時，她說：「都會！不過冇咁快喇，等我工作穩定啲先，仔女都冇所謂，我𠵱家先得24歲，距離結婚仲有好遠。」
拒使老公錢
戚黛黛近年專注慧妍雅集工作，同樣甚愛小朋友的她準備與母親合資開設幼兒園，她笑言目前工作量減少，故一定要為將來着想，問到會否考慮嫁個有錢人時，戚黛黛說：「我覺得都係靠自己會開心啲，使人哋嘅錢會比較受氣，我咁大個女都只係使過一個男人嘅錢，就係我阿爸。」此外，周家蔚表示母親目前報讀幼兒教育，她說：「佢話第時可以幫我湊BB。」
採訪：王崇穎
攝影：仇志德
