2005年日本推出一套《幪面超人THEFIRST》電影，35年後重新打造元祖英雄故事，令到新一代「假面迷」真正體會到「蝗蟲不死」嘅精神，30多年前幪面超人男主角造型真係娘到極點，藤岡弘加上佐佐木剛，到今日換來兩位型仔黃川田將也同高野八誠，不再是珠圓玉潤嘅肥仔超人！將超人翻拍，Bandai又點少得推出一系列玩具搵錢？今次同Medicom推出全新幪面超人2號更加係超限量珍品，噱頭係需要先買乸（1號），先可以買仔（新推出2號），結果2號一到港炒高近一倍，連帶1號都炒貴50%！
記者：羅灝汶
攝影：譚盈傑
買1號得2號「購買券」
早喺3個月前日本Bandai高調同Medicom合作，以全新BM系列之名推出12"Figure，玩具迷當然係高興啦，不過兩間公司合作都係想斬Fans們一頸血，BM推出嘅第一珍品就係《幪面超人THEFIRST》電影版本幪面超人1號，推出時非常矚目，因為超人造型貼近時代，無論皮褸、變身腰帶、手套加上身上嘅筋肉都更加真實，跟足電影版造型，而最抵死就係大家想買今個月推出嘅幪面超人2號就必須先要購入1號，憑當中的購買券先可以將2號入手！不過香港人一向神通廣大，呢一個星期已經有朋友引入2號作獨立售賣，不過價錢就高企$1,480，比起同樣由Medicom製作嘅RAH系列幪面超人舊2號，差不多貴咗一倍，同樣係2號，新嘅造型上有極大改進，手工亦高下立見，一分錢一分貨，Fans們又點會吝嗇嗰少少錢！
Fans自製旋風號電單車
大家都知道Medicom雖然出名Figure手工精細，不過價錢一向昂貴，香港有Fans知道會推出《幪面超人THEFIRST》電影版本幪面超人，就一早為咗呢兩位英雄而設計獨有座駕！簡單材料加埋噴油改裝，不出$600大元成本已經打造出全新幪面超人1號座駕──旋風號！不願出鏡嘅范先生一直都係舊幪面超人系列死硬Fans。今次都係第一次為咗心頭好而設計座駕，究竟點樣先可以將一架價錢$250嘅Honda模型電單車改成旋風號？范先生就教路：「首先要去玩具店購入一架Honda模型電單車，約用百幾蚊去買噴油及上色用具，再用$100左右去添置模型車零件，花費上色嘅時間就用咗2日左右，再慢慢加置零件道具都用咗一日多時間，其實都幾花心思，不過製成後成功感超大。」
鐵人兄弟：新超人手工真係好
鐵人兄弟Kenny：
「我最欣賞幪面超人Figure嘅衫；因為車工真係做得非常好，而且關節郁動後衣着都冇變形，好值得做玩具嘅朋友學習。」
鐵人兄弟Winson：
「兩代幪面超人嘅比例都好出色，一見已經好想買；像真度有電影版80%。不過Medicom嘅12吋骨架好似比較瘦小，大隻啲就更好啦。」
Husky主腦Kelvin：
「V3係我最鍾意嘅幪面超人，不過今次1、2號推出公仔真係好有時代感，加上有Fans識得自製旋風號，我更加有興趣買番隻。」
