十二月二十七日國企指數瘋漲六百幾點（本地叫喪升），帶動恒指升咗四百點，業界大行一早預測明年恒指升破一萬九千三，國企指數升破一萬。呢，基金經理還在放假滑雪之際，目標位已經全部破位，咁明年新目標又如何呢？繼續坐火箭？
內地資金氾濫，優質股票少，一窩蜂咁嚟追逐銀行保險股，唔理得基本因數、技術走勢咯，股民見股票就買。本以為本港股民、基金經理久經風浪，知道高升低跌嘅歷史，唔會同內地股民鬥癲。點知利之所在，人人誓不執輸，你追我趕之下，不理後果如何咯。
你追我逐係講A股H股之相互影響，A股升，H股追上去；如果H股升得過份，A股不甘落後，又追上嚟，於是因因果果分不清，直至大家暈低為止。
睇內地經濟數據，○七年股市上升，應無疑問，但一年目標，可在一個星期內超標，任何一位理性謹慎投資者都難以面對，惟有見步行步。賓架陳已經在日本長野縣放假，大除夕回港，二十七號打電話返嚟問市，知道大市瘋了，為之心緒不寧，佢在電話對左丁山講：「情況令我諗起一九八七，當年八月我放大假去咗布吉島，當時股市大旺，我攬住啲股票唔捨得放，日日打電話返香港問價，嗰陣時冇手機漫遊，電話費好貴，但與股價相比，算得係咩嘢吖。九月返工之後，重未捨得放，後來好彩俾老婆迫住換樓，賣出大部份股票，先至避過十月股災。」哦哦，𠵱家先知佢嘅家庭秘密，當年佢自稱係股市先知，原來係老婆之功。
香港細，內地巨型，香港受內地牽動，將來香港假期即使唔向內地看齊，基金經理在復活節、聖誕節呢類假期恐怕放假唔會放得好安樂，反而在內地黃金周，上海停市之時，就可以玩得安心。內地股民稱2006年為A股元年（即06年之前唔使提），以後還有黃金十年，大家綁緊安全帶，衝呀！